Нацыянальная бібліятэка Беларусі штогод выпускае зборнік навуковых артыкулаў з працягам "Здабыткі: дакументальныя помнікі на Беларусі" і запрашае да супрацоўніцтва даследчыкаў кніжнай культуры.
У ім будуць адлюстраваны матэрыялы па праблемах вывучэння, захоўвання і выкарыстання дакументальнай спадчыны Беларусі, гісторыі рукапіснай і друкаванай кнігі, архіўных дакументаў, бібліятэчнай справы, бібліяграфазнаўства, культуралогіі, падрыхтаваных беларускімі і замежнымі даследчыкамі кніжнай культуры.
Зборнік з’яўляецца шматпрофільным рэцэнзуемым навуковым выданнем. Ён уключаны ў Пералік навуковых выданняў Рэспублікі Беларусь для апублікавання вынікаў дысертацыйных даследаванняў па педагагічных навуках (бібліятэказнаўстве, бібліяграфазнаўстве, кнігазнаўстве), гістарычных навуках (дакументалістыцы, дакументазнаўстве, архівазнаўстве, гістарыяграфіі, крыніцазнаўстве і метадах гістарычных даследаванняў) і культуралогіі.
Да публікацыі ў зборніку прымаюцца артыкулы, прысвечаныя дакументальным помнікам і гісторыі кніжнай культуры Беларусі, якія маюць навуковы характар і вызначаюцца навізной прадстаўленых вывадаў. Яны павінны мець рэкамендацыю аддзела (кафедры, лабараторыі) навуковай (вучэбнай) установы або рэцэнзію спецыяліста ў дадзенай галіне. Рэдакцыя пакідае за сабой права адбору матэрыялаў і накіравання іх на дадатковае рэцэнзаванне. Заяўка на ўдзел павінна ўключаць звесткі пра аўтара (прозвішча, месца работы, пасаду, вучоную ступень і званне, кантактны тэлефон, e-mail) і назву артыкула.
Рукапісы артыкулаў прымаюцца ў электронным выглядзе (e-mail: kireeva@nlb.by або sapega@nlb.by). Аб’ём артыкула – да 10 старонак фармату А4, надрукаваных праз 1,5 інтэрвал, шрыфт Times New Roman, кегль 14 п. Мовы артыкулаў – беларуская, руская, польская і англійская. Артыкул афармляецца ў адпаведнасці з Інструкцыяй па афармленні дысертацыі, аўтарэферата і публікацый па тэме дысертацыі. Спіс выкарыстаных крыніц афармляецца ў адпаведнасці з патрабаваннямі Вышэйшай атэстацыйнай камісіі, размяшчаецца ў канцы тэксту, спасылкі нумаруюцца згодна з парадкам цытавання, у тэксце артыкула парадкавыя нумары спасылак паказваюцца ў сярэдзіне квадратных дужак, напрыклад: [1], [2].
Да артыкула прыкладаецца рэзюмэ на англійскай мове аб’ёмам 100–150 слоў. Ілюстрацыі падаюцца ў рэдакцыю ў электронным выглядзе ў файлах фарматаў tiff, jpeg, gif з якасцю не менш за 300 dpi.
Заяўкі і рукапісы артыкулаў для публікацыі накіроўваюцца на адрас рэдакцыі да 30 красавіка 2018 г.
Адрас рэдакцыі:
Нацыянальная бібліятэка Беларусі,
220114, г. Мінск, прасп. Незалежнасці, 116.
Тэлефоны:
8 017 293 27 81 (Кірэева Галіна Уладзіміраўна, загадчык навукова-даследчага аддзела кнігазнаўства)
8 017 293 27 82 (Сапега Таццяна Андрэеўна, загадчык сектара навукова-даследчага аддзела кнігазнаўства)
Е-mail:
kireeva@nlb.by
sapega@nlb.by
