24 лютага ў межах праекта “Клуб кніжных прафесараў” у музеі кнігі адбыліся заняткі “Рукапісная кніга”.
На мерапрыемстве юныя даследчыкі пазнаёміліся з гісторыяй беларускай рукапіснай кнігі і змаглі пагартаць факсімільныя выданні айчынных рукапісных помнікаў – Тураўскага, Полацкага і Слуцкага Евангелляў. Дзеці атрымалі ўяўленне пра асаблівасці мастацкага афармлення рукапіснай кнігі. Асаблівая ўвага была нададзена буквіцы як элементу афармлення тэксту. Буквіцу ставілі напачатку тэксту, рабілі яе вялікага памеру і багата расквечвалі разнастайным арнаментам. Яе раней вельмі часта пісалі чырвоным колерам. Адсюль і пайшло паняцце “чырвоны радок” – пачатак абзаца.
Удзельнікі заняткаў атрымалі магчымасць уключыцца ў творчы працэс і стварыць сваю ўнікальную першую літару. Дзеці самі малявалі буквіцу і такім чынам станавіліся актыўнымі прадаўжальнікамі рукапіснай традыцыі.
Матэрыял прадастаўлены навукова-выдавецкім аддзелам кнігазнаўства.