У музеі кнігі рукапісную кніжную культуру вывучалі ўдзельнікі групы “Намаляваная кніга” Мінскага дзяржаўнага палаца дзяцей і моладзі.
У студыі юныя ілюстратары займаюцца даследаваннем дызайну кнігі і стварэннем кніжных ілюстрацый. На музейных занятках яны пазнаёміліся з асноўнымі формамі і матэрыяламі кнігі і гісторыяй беларускай рукапіснай кнігі.
У экспазіцыі юныя даследчыкі ўбачылі арыгінальныя рукапісныя кнігі XV–XVIII стагоддзяў, а таксама змаглі пагартаць факсімільныя выданні першых айчынных рукапісных помнікаў – Тураўскага, Полацкага і Слуцкага Евангелляў.
Удзельнікі заняткаў атрымалі ўяўленне пра тыпы пісьма, а таксама пра асаблівасці мастацкага афармлення рукапіснай кнігі. Пільная ўвага была нададзена буквіцы як элементу афармлення тэксту. Буквіцу стваралі ў пачатку тэксту, робячы яе вялікага памеру і багата ўпрыгожваючы разнастайным арнаментам. Яна служыць не толькі для афармлення тэксту, але і сімвалізуе яго пачатак.
Юныя ілюстратары атрымалі магчымасць уключыцца ў творчы працэс і стварыць сваю ўнікальную першую літару. Яны самі малявалі буквіцы і такім чынам станавіліся актыўнымі прадаўжальнікамі рукапіснай традыцыі.
Заняткі “Рукапісная кніга” былі арганізаваны па ініцыятыве кіраўніка моладзевай фотастудыі “Краявід” Аляксея Паўлюца і кіраўніка групы “Намаляваная кніга” Кацярыны Максіменка.
Матэрыял прадастаўлены навукова-даследчым аддзелам кнігазнаўства.