28 лютага на Мінскай міжнароднай кніжнай выстаўцы-кірмашы Нацыянальная бібліятэка Беларусі прадставіла праграму для дзяцей.
Заняткі ад праекта “У госці да кніг” былі прысвечаны прыгожым літарам-ініцыялам. Дзеці знаходзілі іх у старажытных рукапісах, выданнях Францыска Скарыны і сучасных кнігах, прадстаўленых на выстаўцы-кірмашы.
Ініцыялы маюць даўнюю гісторыю. Іх нашыя продкі змяшчалі ўжо ў Тураўскім і Полацкім Евангеллях – самых старажытных рукапісах, якія паходзяць з беларускіх зямель. Традыцыя перайшла і ў друкаваную кнігу. Францыск Скарына выкарыстоўваў ініцыялы ў сваіх кнігах, выдадзеных у Празе і Вільні. У пражскіх выданнях ініцыялы ўжываюцца 766 разоў, а і для іх друку было выраблена больш за сто арыгінальных дошак.
Дзеці вучыліся бачыць ініцыялы, разважалі над іх прызначэннем, малявалі іх і складвалі з пазлаў.
У занятках прынялі ўдзел вучні сярэдняй школы № 128 г. Мінска.
