У рамках Года малой радзімы віртуальная чытальная зала запрашае пазнаёміцца з другім па велічыні горадам Беларусі – Гомелем. Дапамогуць у гэтым інфармацыйныя рэсурсы Цэнтральнай гарадской бібліятэкі імя А. І. Герцэна, якой у красавіку 2019 года спаўняецца 100 гадоў з часу заснавання.
Шырокая інфармацыйная панарама горада над Сожам разгортваецца перад позіркам падарожнікаў-краязнаўцаў пры звароце да інфармацыйнага рэсурсу “Гомель: старонкі гісторыі”. Гідамі па гістарычнай прасторы горада выступаюць удзельнікі Гомельскага гарадскога краязнаўчага таварыства, якое дзейнічае пры бібліятэцы. З іх дапамогай прыхільнікі гісторыка-пазнавальнага турызму пазнаёмяцца з гісторыяй герба горада і археалагічнымі калекцыямі, якія захоўваюцца ў музеі “Гомельскі палацава-паркавы ансамбль”, перагартаюць старонкі ваенна-палітычнай і сацыяльна-эканамічнай гісторыі горада, даведаюцца аб развіцці ў ім культуры і мастацтва, пазнаёмяцца з асобамі выбітных гараджан.
Горад – гэта людзі. Паўнатэкставая база даных “Гомель: імянныя вуліцы” змяшчае звесткі аб вуліцах, названых у гонар пісьменнікаў і паэтаў, Герояў Савецкага Саюза, удзельнікаў Вялікай Айчыннай вайны. Фактаграфічная даведка пра вуліцу дапоўнена біяграфічнай і бібліяграфічнай інфармацыяй аб персоне, цікавымі фактамі і поўнымі тэкстамі публікацый. Камфортнасць выкарыстання рэсурсу забяспечваецца яго інтэграцыяй з пошукава-інфармацыйнай картаграфічнай службай Яндэкса.
Інфармацыйны рэсурс “Мастакі і пісьменнікі Гомеля” падрыхтаваны па матэрыялах мерапрыемстваў літаратурна-мастацкага салона бібліятэкі. У ім прадстаўлены паўнатэкставыя, ілюстрацыйныя і бібліяграфічныя матэрыялы, якія дазваляюць атрымаць яркае ўяўленне пра жанравую разнастайнасць твораў гомельскіх мастакоў і пісьменнікаў, даведацца пра творы, прысвечаныя Гомельшчыне і гораду Гомелю. Мастакамі яны выкананы ў жанрах гарадскога, індустрыяльнага або лірычнага пейзажу, літаратарамі – у паэтычных, празаічных, драматургічных творах і слоўніках, прысвечаных тапонімам Гомеля і яго ваколіц.
Краязнаўцам-бібліяфілам будзе цікавы і “Музей аўтографа”. Рэсурс адлюстроўвае аўтографы прадстаўнікоў самых разнастайных відаў дзейнасці на кнігах і іншых дакументах. Прыводзяцца тэксты дароўных надпісаў, іх фотавыявы, фактаграфічныя даведкі пра дарыльшчыкаў і акалічнасці дарэння.
Інфармацыйныя рэсурсы, створаныя з любоўю да роднага горада супрацоўнікамі Цэнтральнай гарадской бібліятэкі г. Гомеля, дазволяць пабудаваць індывідуальныя турыстычныя маршруты на любы густ.
Матэрыял прадастаўлены аддзелам карпаратыўнага ўзаемадзеяння.
