Штогод 9 Мая мы ўспамінаем тых, чые жыцці перапыніла вайна, і нізка кланяемся героям. Захаваць памяць пра іх подзвігі, самаахвяраванне – наш святы абавязак.
Прайшло 75 гадоў пасля вызвалення ад нямецка-фашысцкіх захопнікаў. Сведак тых падзей становіцца з кожным годам усё менш, таму цяпер асабліва важна выказаць ім падзяку. Усе яны сталі ўзорам мужнасці, сілы духу для сваіх нашчадкаў.
Вялікая Айчынная вайна аказалася жорсткім урокам гісторыі. Таму сёння мы жадаем усім мірных дзён і добрых вестак, сонечнага неба над галавой і шчасця ў кожны дом. Хай вайна ніколі не закране нават маленькай часцінкі вашага жыцця. Прыміце самыя цёплыя пажаданні моцнага здароўя, утульнасці і дабрабыту.
Мірнага неба вам і вашым блізкім!
Плакат “Воіну-вызваліцелю слава! 1941–1945”, 1951 г. Мастак М. Смаляк.
Да 75-годдзя Перамогі ў Вялікай Айчыннай вайне Нацыянальная бібліятэка Беларусі падрыхтавала маштабны выставачны праект “Вялікая Перамога”, а таксама віртуальныя праекты “100 дзён да Вялікай Перамогі. Па старонках беларускіх газет 1945 г.” і “Падпольны і партызанскі друк Беларусі”.