26 мая да Дня абароны дзяцей адбудзецца адкрыццё выстаўкі выяўленчай студыі "Васілёк" Мінскай абласной дзяржаўнай спецыяльнай школы-інтэрната для дзяцей з парушэннем слыху.

Напярэдадні самога добрага свята – Міжнароднага дня абароны дзяцей – панарамную галерэю бібліятэкі ўпрыгожыць экспазіцыя з летняй назвай "Яркія фарбы «Васілька»".

Арганізатарамі праекта з'яўляюцца Нацыянальная бібліятэка Беларусі, упраўленне адукацыі Мінскага аблвыканкама і Мінская абласная дзяржаўная спецыяльная школа-інтэрнат для дзяцей з парушэннем слыху, у якой ужо 25 гадоў працуе мастацкая студыя "Васілёк".

За час існавання студыі яе юныя мастакі неаднаразова ўдзельнічалі ў рэспубліканскіх і міжнародных выстаўках дзіцячай творчасці, якія праходзілі ў Санкт-Пецярбургу, Маскве, гарадах Японіі, Германіі, Францыі, а таксама ў многіх галерэях і музеях Мінска.

На выстаўцы будзе прадстаўлена каля 30 работ, выкананых у тэхніцы алейнага жывапісу. Наведвальнікі мерапрыемства змогуць атрымаць асалоду і прасякнуцца карцінамі, якія лепш чым словы распавядаюць аб настроі і жаданнях юных творцаў, іх асаблівым бачанні і ўспрыманні свету, прыгажосці прыроды.

У праграме адкрыцця – незвычайныя харэаграфічныя пастаноўкі, песні, якія суправаджаюцца жэстамі, выступленне тэатра пантамімы.

Мерапрыемства пачнецца а 16-й гадзіне ў галерэі "Панарама" (22-гі паверх).

Выстаўка будзе доўжыцца да 27 чэрвеня 2016 г.

Тэлефоны для даведак: (8 017) 293 27 56, 293 28 33.
Е-mail: pr@nlb.by