Яркім непаўторным вечарам завяршыўся цыкл бясплатных публічных лекцый “Беларуская музыка ў сусветнай мастацкай прасторы” – сумеснага праекта Нацыянальнай бібліятэкі Беларусі і Нацыянальнай акадэміі навук Рэспублікі Беларусь.
Завяршальнае мерапрыемства прайшло з удзелам музычнай капэлы “Cantus Alba Rutheniae”.
Меладычныя гукі струннага квартэта, вакальныя творы, выкананыя прафесійным хорам, напаўнялі залу настроем надыходзячых святаў – Божага Нараджэння і Новага года.
Гледачам, якіх у гэты вечар было каля 100 чалавек, выпала магчымасць дакрануцца да скарбніцы нацыянальнай музычнай культуры – калядных песень і кантаў. Па традыцыі разам з хорам яны выканалі некалькі твораў.
Гукі нацыянальнага аўтэнтычнага інструмента – дуды, быццам покліч продкаў, ніколі не пакідаюць абыякавым ніводнага чалавека. Сюрпрызам для гледачоў стала прапанова артыста капэлы Яўгенія Салаўёва адгадаць знаёмыя ўсім мелодыі ў гэтым незвычайным выкананні.
Дзякуючы жывому кантакту з залай, калядным мелодыям і навагодняму настрою вечар быў напоўнены неверагодна цёплай, чароўнай атмасферай.
Не дзіўна, што ў канцы мерапрыемства гледачы шчыра дзякавалі артыстам капэлы за музычны падарунак. Прагучала шмат добрых слоў у адрас кіраўніка калектыву Галіны Паўлаўны Цмыг, а таксама ў адрас усіх тых, хто меў дачыненне да арганізацыі “Гадзіны музыкі”. Развітваючыся, госці выказвалі надзею на хуткую сустрэчу ў наступным сезоне.
“Гадзіна музыкі” будзе працягвацца. Сачыце за навінамі на партале. Да сустрэчы ў новым годзе!
Матэрыял прадастаўлены аддзелам абслугоўвання спецыялізаванымі фондамі.