22 ліпеня ў музеі кнігі Нацыянальнай бібліятэкі Беларусі адбылося адкрыццё выставы “Ян Баршчэўскі, які любіў Бога, прыроду і людзей”, на якой упершыню дэманструюцца разам аўтэнтычныя сведчанні пра знакамітага пісьменніка, аднаго з пачынальнікаў новай беларускай літаратуры.
Упершыню ў Мінску можна пабачыць нядаўна адшуканую пахавальную пліту Яна Баршчэўскага. Таксама на выставе прадстаўлены каштоўныя кнігі з фондаў бібліятэкі – аўтэнтычныя прыжыццёвыя выданні пісьменніка: зборнік “Шляхціч Завальня, або Беларусь у фантастычных апавяданнях” (1844–1846), альманах “Незабудка” (1840–1844) і іншыя вельмі каштоўныя выданні.
З прывітальным словам да прысутных звярнуўся намеснік генеральнага дырэктара Нацыянальнай бібліятэкі Беларусі Алесь Суша. Ён распавёў аб спадчыне Яна Баршчэўскага і падкрэсліў важнасць папулярызацыі рэдкіх выданняў беларускага пісьменніка.
Прадстаўнік Фонду імя Марыі Магдалены Радзівіл Міхаіл Рыбакоў расказаў пра адшуканае надмагілле Яна Баршчэўскага ў горадзе Чуднаў (Жытомірская вобласць, Украіна), а таксама падзякаваў Нацыянальнай бібліятэцы Беларусі за магчымасць прадставіць артэфакт у экспазіцыі музея кнігі для шырокага кола наведвальнікаў.
Галоўны захавальнік фондаў Музея баявой садружнасці (г.п. Расоны) Сяргей Салаўёў падкрэсліў значнасць асобы Яна Баршчэўскага для Беларусі і яго малой радзімы – Расоншчыны.
У пачатку і напрыканцы мерапрыемства гучала жывая музыка ў выкананні Аляксандра Свірскага, кіраўніка беларускага народнага фальклорнага ансамбля “Вербіца”.
Выстава будзе працаваць у музеі кнігі (пам. 347) да 29 ліпеня 2021 г.
Час работы выставы адпавядае рэжыму работы музея кнігі.
Уваход – па чытацкім білеце або білеце сацыякультурнага цэнтра.
Тэлефон для даведак: (8 017) 293 25 85.
Матэрыял пададзены навукова-даследчым аддзелам кнігазнаўства.