Зборнік “Рэха беларускіх кнігазбораў: лёсы прыватных бібліятэк” выйшаў у свет у пачатку года. У ім сабраны гісторыі прыватных кніжных калекцый Беларусі пачынаючы з XVI стагоддзя. Гэтыя гісторыі гучаць досыць рэдка, пра іх мала хто ведае, аднак гэта толькі павялічвае той інтарэс, які ўзнікае пры іх прачытанні.
Зборнік апавядае пра кнігазборы Радзівілаў, Сапег, Храптовічаў, Гутэн-Чапскіх, Пуслоўскіх-Красінскіх. Якія кнігі чытаў тата Максіма Багдановіча? Якую бібліятэку паспелі сабраць браты Каліноўскія? У зборніку апісаны бібліятэкі Саламона Рысінскага, Уладзіслава Сыракомлі, Ігната Дамейкі і іншых беларускіх гістарычных асоб.
Чаму неабходна даследаваць гісторыю кнігазбораў? Кнігазборы акумуліруюць інфармацыю, неабходную для ўразумення гісторыі, грамадскай думкі, культурных кантактаў, для ўзнаўлення рэпертуару і шляхоў міграцыі беларускай кнігі, для даследавання жыцця і дзейнасці асобных людзей. Даследаванне беларускіх кнігазбораў – гэта аднаўленне важнай крыніцы для вывучэння нацыянальнай гісторыі і культуры, сапраўднае вяртанне нашай спадчыны.
Аўтары артыкулаў зборніка – усе дасведчаныя і таленавітыя кнігазнаўцы і гісторыкі – змаглі не толькі з навуковай дакладнасцю распавесці пра бібліятэкі выбітных мясцовых родаў, але і перадаць захопленасць сваёй справай. Складальнік зборніка – вядомы кнігазнавец, заслужаны дзеяч культуры Рэспублікі Беларусь Таццяна Іванаўна Рошчына.
У праграме “Контуры” на АНТ да Дня бібліятэк 2019 зборнік “Рэха беларускіх кнігазбораў: лёсы прыватных бібліятэк” адзначылі як адзін з найцікавейшых гістарычных выданняў.
Зборнік “Рэха беларускіх кнігазбораў: лёсы прыватных бібліятэк” можна набыць па падпісцы альбо купіць у кіёску, размешчаным на 1-м паверсе бібліятэкі каля галоўнага ўвахода.
Матэрыял прадастаўлены навукова-даследчым аддзелам кнігазнаўства.