Дарогу да галоўнай скарбніцы краіны добра ведаюць жыхары Мінска – бліскучы “дыямент” упрыгожвае адзін з галоўных сталічных праспектаў. А вось для турыстаў з усяго свету пошукі галоўнай славутасці горада могуць аказацца сапраўдным квэстам.
Цяпер на дапамогу доўгачаканым гасцям прыйдуць не толькі нашы спагадлівыя людзі, але і “Турыстычны відэадаведнік” – серыя ролікаў аб цікавостках беларускага турызму для адкрытага доступу на канале YouTube.
Не выпадкова адзін з першых ролікаў аўтар праекта Андрэй Гузель прысвяціў Нацыянальнай бібліятэцы Беларусі – візітнай картцы турыстычнага Мінска. Падчас інтэрв’ю з дырэктарам бібліятэкі Раманам Матульскім вядучы даведаўся ўсе самыя цікавыя факты пра “алмаз ведаў”, наведаў святая святых – кнігасховішча і нават уласнаручна выканаў чытацкі заказ.
На сённяшні дзень ролік ужо набраў 1,5 тыс. праглядаў. А значыць, такая колькасць чалавек даведалася пра “беларускі дыямент”, яго ўнікальны дзесяцімільённы фонд, музей кнігі, самыя рэдкія і каштоўныя выданні, якія захоўваюцца ўжо некалькі соцень гадоў.
Што засталося за кадрам, спытаеце вы? Нічога! Атрымаўся максімальна адкрыты, “лайтовы” і вельмі пазнавальны не толькі для турыстаў, але і для беларусаў, ролік.
Глядзіце яго на YouTube і дзяліцеся з сябрамі!
