З 4 па 12 чэрвеня прадстаўнікі бібліятэк, інфармацыйных цэнтраў, кнігагандлёвых і іншых арганізацый Рэспублікі Беларусь узялі ўдзел у Міжнароднай канферэнцыі “Крым-2011”.
Канферэнцыя “Крым-2011: Бібліятэкі і інфармацыйныя рэсурсы ў сучасным свеце навукі, культуры, адукацыі і бізнесу” прайшла ў г. Судаку і шэрагу іншых гарадоў Крыма.
Тэма канферэнцыі была сфармулявана як “Бібліятэкі ў новым дзесяцігоддзі інфармацыйнага стагоддзя: удасканальваючы тэхналогіі і развіваючы супрацоўніцтва”. У яе рабоце ўзялі ўдзел каля 1 000 спецыялістаў з 27 краін.
Асноўнымі праблемна-тэматычнымі кірункамі работы канферэнцыі сталі: сусветная інфармацыйная інфраструктура, міжбібліятэчная кааперацыя і праекты міжнароднага супрацоўніцтва; нацыянальныя бібліятэкі і нацыянальныя інфармацыйныя рэсурсы; узаемадзеянне бібліятэк, кнігавыдаўцоў і кніжнага рынку; электронныя бібліятэкі і электронныя рэсурсы; аўтаматызаваныя бібліятэчныя сістэмы і інфармацыйныя тэхналогіі і інш.
Беларуская дэлегацыя была прадстаўлена кіраўнікамі і спецыялістамі Нацыянальнай бібліятэкі Беларусі, Беларускай сельскагаспадарчай бібліятэкі імя І.С. Лупіновіча НАН Беларусі, навуковай бібліятэкі БНТУ, бібліятэкі БДУ культуры і мастацтваў, Аб'яднанага інстытута праблем інфарматыкі НАН Беларусі, Пасольства ЗША ў Беларусі, СТАА “Трэграс”.
