Прадстаўнікі бібліятэк, інфармацыйных цэнтраў, кнігагандлёвых і іншых арганізацый Рэспублікі Беларусь узялі ўдзел у XVII Міжнароднай канферэнцыі “Крым-2010”.
Канферэнцыя “Крым-2010: Бібліятэкі і інфармацыйныя рэсурсы ў сучасным свеце навукі, культуры, адукацыі і бізнесу” прайшла ў г. Судак і шэрагу іншых гарадоў Крыма з 5 па 13 чэрвеня 2010 г.
Тэма канферэнцыі: “Роля бібліятэк у павышэнні ўзроўню інфармацыйнай культуры і захаванні культурнай спадчыны ў сучасных умовах развіцця грамадства”.
У цэнтры ўвагі былі пытанні стварэння і функцыянавання электронных бібліятэк, карпаратыўных бібліятэчна-інфармацыйных сістэм, праблемы сучаснага бібліятэказнаўства і інфарматыкі, а таксама пытанні работы бібліятэк ва ўмовах узмацнення жорсткасці законаў аб ахове аўтарскіх праў.
Беларуская дэлегацыя ў складзе 19 чалавек была прадстаўлена кіраўнікамі і спецыялістамі Нацыянальнай бібліятэкі Беларусі, Беларускай сельскагаспадарчай бібліятэкі НАН Беларусі, Мінскай абласной бібліятэкі, навуковай бібліятэкі БНТУ, бібліятэкі БДУ культуры і мастацтваў, Аб’яднанага інстытута праблем інфарматыкі НАН Беларусі, упраўлення інфармацыі Нацыянальнага банка Рэспублікі Беларусь, Пасольства ЗША ў Беларусі, прыватнага прадпрыемства “Сіс інжынірынг”, ЗАТ “Делсар”, кампаніі “Новое знание”, СТАА “Трэгросс”.
Ад Нацыянальнай бібліятэкі Беларусі на канферэнцыі выступалі намеснік дырэктара па інфармацыйных рэсурсах Т.В. Кузьмініч з дакладам "Фактаграфічныя базы даных, якія генерыруе Нацыянальная бібліятэка Беларусі, як крыніца інфармацыі пра нацыянальныя аб’екты" (семінар “Захаванне культурнай спадчыны”) і начальнік інфармацыйнага цэнтра А.А. Шарамецьева з дакладам на тэму "Вопыт арганізацыі і прававое забеспячэнне кантэнту электроннай бібліятэкі Нацыянальнай бібліятэкі Беларусі" (секцыя “Электронныя бібліятэкі”).
 |
 |
 |
