6 снежня 2007 года ў Варшаўскім Палацы навукі і культуры адбылося афіцыйнае адкрыццё XIV кніжнага кірмашу "Антэна 2007".
Да яго ўдзелу былі прыцягнуты больш за 100 выдавецтваў з Польшчы і суседніх краін. Рэспубліка Беларусь была прадстаўлена стэндам Нацыянальнай бібліятэкі Беларусі.
У рамках кірмашу прайшоў круглы стол "Сітуацыя нацыянальных бібліятэк Цэнтральнай і Усходняй Еўропы на фоне сусветных тэндэнцый выкарыстання найноўшых тэхналогій пры абслугоўванні чытачоў".
У пасяджэнні круглага стала ўдзельнічалі кіраўнікі нацыянальных бібліятэк Беларусі, Германіі, Латвіі, Літвы, Польшчы, Расіі, Румыніі, Славакіі, Украіны, Чэхіі, Эстоніі. Пасяджэнне прайшло пад старшынствам генеральнага дырэктара Нацыянальнай бібліятэкі Германіі, Старшыні Канферэнцыі нацыянальных бібліятэк Еўропы (CENL) сп-ні Элізабэт Нігеман. Удзельнікі круглага стала абмеркавалі наступныя праблемы:
- рэтраканверсія нацыянальнай пісьмовай спадчыны і будучыня нацыянальных бібліятэк;
- бібліяграфічная рэгістрацыя нацыянальных даменаў;
- правілы фінансаванні праектаў па алічбоўцы;
- аўтарскае права і агульны доступ да дакументаў праз Інтэрнэт.
З беларускага боку ў рабоце круглага стала прыняў удзел дырэктар НББ праф. Р.С. Матульскі, які ў сваім выступленні распавёў аб ходзе рэтраканверсіі картачных каталогаў НББ, развіцці сістэмы карпаратыўнай каталагізацыі, алічбоўцы фондаў і стварэнні электроннай бібліятэкі. Падчас перамоў таксама былі разгледжаны пытанні ўдзелу НББ у праектах Канферэнцыі нацыянальных бібліятэк Еўропы (CENL) па стварэнні еўрапейскай віртуальнай бібліятэкі.
