12–13 мая ў Гродзенскім дзяржаўным універсітэце імя Янкі Купалы прайшлі XIII Міжнародныя Карскія чытанні “Славянскі свет і нацыянальная маўленчая культура ў сучаснай камунікацыі”.
Чытанні былі прымеркаваны да 155-х угодкаў з дня нараджэння акадэміка Яўхіма Фёдаравіча Карскага.
Сёлета ў традыцыйных Карскіх чытаннях бралі ўдзел даследчыкі з розных краін: Беларусі, Расіі, Украіны, Польшчы і нават Кітая. Прыехаў з дакладам з Санкт-Пецярбурга пачэсны госць – праўнук акадэміка Аляксандр Аляксандравіч Карскі.
На пленарным пасяджэнні, якое адбылося пасля ўрачыстага адкрыцця чытанняў, ад Нацыянальнай бібліятэкі Беларусі выступіла вядучы бібліёграф навукова-даследчага аддзела кнігазнаўства Людміла Данілаўна Сільнова з дакладам і прэзентацыяй “Бібліятэка Я. Карскага ў фондзе Нацыянальнай бібліятэкі Беларусі: агульная характарыстыка калекцыі на базе створаных бібліяграфічных запісаў у фармаце BELMARC”.
Даклад быў прысвечаны былой асабістай бібліятэцы вучонага, якая захоўваецца сёння ў галоўнай кніжніцы Беларусі. Бібліятэка Карскага з цяжкасцю была вывезена ім з Варшавы, дзе ён доўгі час жыў і працаваў у якасці прафесара, рэктара Варшаўскага універсітэта. Прыватнаму кнігазбору нададзены статус гістарычнай калекцыі. У дакладзе Сільновай дадзеная калекцыя разглядаецца па розных прыкметах з прымяненнем пошукавых магчымасцяў сучасных электронных тэхналогій: храналагічны дыяпазон, геаграфія месца выдання, мова выданняў, дароўныя надпісы, маргіналіі і інш.
У рамках чытанняў адбыліся таксама цікавыя дыскусіі і круглыя сталы па медыялінгвістыцы, праблемах сучаснага мовазнаўства, практыцы дыскурсіўнага аналізу.
Удзельнікам чытанняў была прапанавана культурная праграма: паездка ў вёску Лаша – на радзіму Карскага, экскурсія ў музей універсітэта, экскурсія па горадзе Гродна.
