Нацыянальнай бібліятэкай Беларусі падрыхтаваны і выпушчаны зборнік “Бібліятэчнае краязнаўства: прастора вялікіх магчымасцей і перспектыў”.
Краязнаўства – тэрыторыя вялікіх магчымасцей для праяўлення талентаў, любові да родных мясцін. Асабліва ў бібліятэчнай сферы дзякуючы яе інфармацыйнай насычанасці і адкрытасці. Кожнаму цывілізаванаму грамадству ўласцівы дбайныя адносіны да бібліятэк, таму што іх значэнне ў захаванні гісторыка-культурнай спадчыны ніякі іншы сацыяльны інстытут пераважыць не можа. Іх намаганнямі назапашваецца і захоўваецца дакументаваная інфармацыя, якая з’яўляецца вынікам жыццядзейнасці грамадства ў цэлым, а таксама асобных нацыянальных, геаграфічна-тэрытарыяльных сегментаў, і якая сведчыць аб узроўні яго інтэлектуальнага, творчага, вытворчага развіцця. Яна становіцца для даследчыка і выкладчыка, студэнта і навучэнца, кіраўніка і аматара крыніцай ідэй, навуковых фактаў, пабуджальным матывам у творчых пошуках.
Бібліятэчныя спецыялісты пры гэтым выступаюць не толькі надзейнымі праваднікамі і натхняльнікамі, дарадцамі і паплечнікамі, але і даследчыкамі, роўнымі, а часам і вышэйшымі па глыбіні і маштабнасці пошуку за самых руплівых навукоўцаў. Яны дапамагаюць упарадкаваць свет краязнаўчай інфармацыі, аналізуюць яго і дзеляцца вынікамі неабмежавана, бескарысліва і ўвесь час. Краязнаўства – гэта высакародная справа бібліятэк любога ўзроўню – ад нацыянальнай да самай маленькай сельскай. А дасягненні вымяраюцца не столькі маштабамі, колькі глыбінёй і паслядоўнасцю пошуку фактаў, арыгінальнасцю і грунтоўнасцю распрацовак.
У маі 2012 г. у Нацыянальнай бібліятэцы Беларусі адбыўся міжнародны навукова-практычны семінар “Бібліятэчнае краязнаўства: тэрыторыя вялікіх магчымасцей і перспектыў”, прысвечаны развіццю бібліятэчнага краязнаўства. Ён стаў сапраўднай падзеяй у жыцці бібліятэчнай супольнасці нашай краіны. Па сутнасці ў Беларусі з канца 1990-х гг. на гэтым важнейшым кірунку работы сучасных бібліятэк не акцэнтавалася ўвага, на гэтай ніве плённа працавалі, але яна заставалася па-за межамі магістральных шляхоў развіцця айчынных бібліятэказнаўства і бібліяграфазнаўства, прыняцця цэнтралізаваных арганізацыйных і метадычных рашэнняў.
Семінар сабраў не толькі прадстаўнікоў буйнейшых бібліятэк нашай краіны, але і Польшчы, Расіі, Ізраіля. Выступленні мелі ў асноўным практыка-арыентаваны характар і адлюстроўвалі розныя кірункі бібліятэчнага краязнаўства: фарміраванне фондаў краязнаўчай літаратуры, стварэнне бібліяграфічных паказальнікаў, баз даных, сэнсавую апрацоўку краязнаўчай літаратуры і да т.п. Гэта была вельмі цікавая размова людзей, апантаных сваёй працай, ідэямі развіцця краязнаўчага руху і бібліятэчнага падзвіжніцтва.
Удзельнікамі семінара была выказана прапанова апублікаваць лепшыя даклады ў аднайменным зборніку. Таму большасць матэрыялаў выдання складаюць выступленні ўдзельнікаў. Але спектр краязнаўчай дзейнасці вельмі вялікі і для больш дэталёвага раскрыцця розных яго аспектаў было прынята рашэнне аб правядзенні дадатковага збору артыкулаў, метадычных распрацовак і да т.п. На запрашэнне адгукнуліся абласныя і раённыя бібліятэкі нашай краіны, а таксама Нацыянальная бібліятэка Польшчы, Расійская нацыянальная бібліятэка, Нацыянальная бібліятэка Рэспублікі Карэлія, рэгіянальныя бібліятэкі Расійскай Федэрацыі. Асобую ўдзячнасць неабходна выказаць Расійскай бібліятэчнай асацыяцыі, якая спрыяла збору матэрыялаў у розных бібліятэках і даслала прадстаўленыя ў электронным выглядзе тэксты (Библиотечное краеведение: территория больших возможностей: материалы межрегион. науч.-практ. конференции (Архангельск, 9–12 октября 2012 г.) [Электронный ресурс] / Арханг. обл. науч. б-ка им. Н.А. Добролюбова; сост. Е. Тропичева; науч. редактор Н. Балацкая. – Архангельск: Архангельская областная научная библиотека им. Н.А. Добролюбова, 2012. – 1 эл. опт. диск (DVD)), частка з якіх апублікавана ў зборніку.
Зборнік артыкулаў складаецца з чатырох раздзелаў і адлюстроўвае найбольш актыўныя кірункі краязнаўчай работы бібліятэк на сучасным этапе: фарміраванне краязнаўчых калекцый у фондах бібліятэк, стварэнне электронных краязнаўчых рэсурсаў, узаемадзеянне бібліятэк з музеямі, архівамі, папулярызацыя краязнаўчых інфармацыйных рэсурсаў.
Змест публікацый зборніка сведчыць аб вялікай увазе, якую бібліятэкі надаюць краязнаўству, вывучэнню дакументнай спадчыны рэгіёнаў, фарміраванню і захаванню асобных калекцый, стварэнню разнастайнай інфармацыйнай прадукцыі.
Прапанаваныя матэрыялы будуць карыснымі для вывучэння, магчыма для пераймання вопыту і яго далейшага навуковага абагульнення. Шматаспектнасць зместу публікацый і форм іх падачы скіравана на самую шырокую чытацкую аўдыторыю: ад даследчыкаў, вынаходнікаў, спецыялістаў у галіне краязнаўства да аматараў і ўсіх, хто цікавіцца гісторыяй роднага краю.
