З мэтай прафесійнай падрыхтоўкі спецыялістаў у галіне культуры, у адпаведнасці з дамовай на праходжанне практыкі паміж Нацыянальнай бібліятэкай Беларусі і Беларускім дзяржаўным універсітэтам культуры і мастацтваў, бібліятэка штогод прымае на сваёй базе студэнтаў для праходжання практыкі.
З 11 лістапада па 20 снежня праходзіла вытворчая практыка студэнтаў трэцяга курса БДУКМ па спецыяльнасці “Бібліятэчна-інфармацыйная дзейнасць” факультэта інфармацыйна-дакументных камунікацый.
Падчас практыкі студэнты азнаёміліся з працай 15 аддзелаў і іх сектараў. Тэарэтычныя веды, атрыманыя студэнтамі за тры гады навучання ва ўніверсітэце, знайшлі адлюстраванне ў практычнай дзейнасці.
Будучыя спецыялісты азнаёміліся з працэсамі камплектавання фондаў, бібліяграфічнай апрацоўкі і індэксавання дакументаў, вядзення базы даных аўтарытэтных запісаў, кнігазахавання, захоўвання спецыялізаваных фондаў, рэстаўрацыі і кансервацыі бібліятэчных дакументаў, карпаратыўнага ўзаемадзеяння, даведачна-інфармацыйнага абслугоўвання, бібліятэчнага абслугоўвання, абслугоўвання спецыялізаванымі фондамі і афіцыйнымі дакументамі, вядзеннем запісу карыстальнікаў і іх інфармаваннем. Студэнты таксама азнаёміліся з работай аддзела міжбібліятэчнага абанемента і дастаўкі дакументаў, сацыякультурнага цэнтра.
Нягледзячы на непрацяглы перыяд, кіраўнікі практыкі і супрацоўнікі Нацыянальнай бібліятэкі прыклалі максімум намаганняў, каб у поўнай меры перадаць назапашаны вопыт. Атрыманыя веды і навыкі будуць садзейнічаць падрыхтоўцы будучых высокакваліфікаваных спецыялістаў.
Матэрыял прадастаўлены навукова-даследчым аддзелам бібліятэказнаўства.
