Міжнародная выстаўка “Беларусь і Біблія” завершана. Выставачны праект быў сапраўды ўнікальны, паспяховы, цікавы і запатрабаваны. За перыяд дзейнасці з 20 верасня да 21 кастрычніка экспазіцыю наведала каля 30 тысяч чалавек!
Унікальны міжнародны выставачны праект “Беларусь і Біблія” быў арганізаваны Нацыянальнай бібліятэкай Беларусі і Групай даследавання рукапісаў (ЗША).
Упершыню ў Беларусі экспанаваліся рарытэты сусветнай значнасці, узрост якіх дасягае 5 тысяч гадоў. Экспазіцыя адлюстроўвала гісторыю Бібліі ад ранніх каштоўных рукапісаў да нашых дзён. На выстаўцы дэманстраваліся рарытэты з Нацыянальнай бібліятэкі Беларусі і замежных прыватных збораў. Асноўную частку экспазіцыі складалі арыгінальныя кніжныя помнікі, сярод якіх піктаграфічныя і клінапісныя таблічкі Месапатаміі (3–2 тыс. гадоў да н.э.), папірусныя фрагменты “Іліяды” Гамера (1 ст. н.э.), байкі Эзопа (1 ст. да н.э. – 1 ст. н.э.), сярэдневяковыя манускрыпты на пергаменце, калекцыя разнастайных тораў, першадрукаваныя біблейскія тэксты, кнігі часоў Рэфармацыі, першыя пераклады Бібліі на нацыянальныя мовы, паліглоты і ілюстраваныя Бібліі.
Выстаўка мела вялікую творчую пляцоўку, дзе можна было навучыцца пісаць гусіным пяром у “рукапіснай майстэрні”, пабыць друкаром і самому надрукаваць старонку з Бібліі Францыска Скарыны, паскладваць пазлы, сфатаграфавацца ў фотазоне “Каўчэг Ноя”. Таксама былі арганізаваны асобныя праграмы для дзяцей на пасяджэннях “Клуба кніжных прафесараў” і музейныя заняткі для школьнікаў.
У межах выставачнага праекта адбыліся шматлікія мерапрыемствы (тры міжнародныя круглыя сталы, шэсць лекцый экспертаў, шматлікія экскурсіі ад куратараў выстаўкі, прэзентацыя кнігі і музычнае выступленне).
Навуковая праграма – міжнародныя круглыя сталы і лекцыі экспертаў – была арганізавана сумесна з Беларускім дзяржаўным універсітэтам.
Міжнародныя навуковыя круглыя сталы:
- “Беларусь і Біблія”
- “Беларускія пераклады Бібліі: гісторыя і сучаснасць”
- “Сучасныя біблейскія даследаванні”
Лекцыі экспертаў:
- Лекцыя “Біблія і навука” нобелеўскага лаўрэата Кэнета Брокмана
- Лекцыя “Берасцейская Біблія і Рэфармацыя ў ВКЛ” доктара Бруса Андэрсана
- Лекцыя “Археалагічныя і рукапісныя сведчанні пра Біблію” доктара Скота Кэрала
- Лекцыя “Пераклады Свяшчэннага Пісання на беларускую мову” кандыдата багаслоўя протаіерэя Сергія Гардуна
- Лекцыя “Сучасны беларускі пераклад Песні Песняў” кандыдата філалагічных навук, германіста, гебраіста, біблеіста Галіны Сініла
- Лекцыя “Біблія і цывілізацыйная мадэль. Шлях Бібліі да Беларусі і шлях Беларусі да Бібліі” біблеіста, доктара сакральнай тэалогіі Ірыны Дубянецкай
Прэзентацыя кнігі:
- Прэзентацыя выдання "Прыгоды вялікай Кнігі" Скота Кэрала
Музычнае выступленне:
- Выступленне Андруся Такінданга і гурта “Рэха” з прэзентацыяй песні “Скарына”
Экскурсіі і заняткі з удзелам куратараў выстаўкі:
- Скот Кэрал у “Клубе кніжных прафесараў”
- Дэніс Элен Кэрал на занятках "Клуба кніжных прафесараў"
- Юныя мастацтвазнаўцы на выстаўцы “Беларусь і Біблія”
- Заняткі на выстаўцы “Беларусь і Біблія”
- Прысвячэнне ў першакласнікі
У СМІ і сацыяльных сетках надрукавана сотні станоўчых і ўражлівых водгукаў ад выставачнага праекта!
