15 мая ў Нацыянальнай бібліятэцы былі падведзены вынікі XXVI Рэспубліканскага конкурсу “Бібліятэка – асяродак нацыянальнай культуры”.
Конкурс праводзіцца штогод сярод публічных бібліятэк краіны з мэтай павышэння ролі бібліятэк у фарміраванні нацыянальнай самасвядомасці насельніцтва, папулярызацыі нацыянальнай культуры, гісторыі, літаратуры, мовы, народных промыслаў, а таксама падтрымкі і развіцця чытання.
У рэспубліканскім этапе конкурсу прынялі ўдзел 38 публічных бібліятэк – 21 цэнтральная і 17 бібліятэк-філіялаў з усіх абласцей нашай краіны.
Гродзенская і Магілёўская вобласці прадставілі на конкурс па 8 работ, Мінская – 7, Брэсцкая – 6, Гомельская – 5, Віцебская – 4.
У адпаведнасці з умовамі правядзення конкурсу матэрыялы разглядаліся ў чатырох намінацыях: “За пошукавую і даследчую работу” – 11 работ, “За падтрымку і развіццё чытання” – 10, За значны ўклад у выхаваўчую работу з падрастаючым пакаленнем” – 9, “За навацыі ў галіне бібліятэчнай справы” – 8.
Члены журы адзначылі вельмі высокі ўзровень прадстаўленых работ, разнастайнасць увасобленых ідэй, крэатыўны падыход да афармлення матэрыялаў і бясконцую творчую энергію бібліятэкараў публічных бібліятэк.
Па выніках конкурсу будзе выдадзены загад міністра культуры Рэспублікі Беларусь. Пераможцы рэспубліканскага этапу конкурсу будуць узнагароджаны дыпломамі першай, другой, трэцяй ступеняў і грашовымі прэміямі.
