18 лютага пачала працу XXVIII Мінская міжнародная кніжная выстаўка-кірмаш (ММКВК).
На кніжным фестывалі Нацыянальная бібліятэка Беларусі прадставіла гледачу выстаўку “Новы дом – новыя перспектывы. Выдавецкія праекты 2006–2021”. Экспазіцыя прымеркавана да 15-годдзя дзейнасці Нацыянальнай бібліятэкі Беларусі ў сучасным будынку.
За 15 год жыцця па новым адрасе былі рэалізаваныя такія праекты, як факсімільнае ўзнаўленне Слуцкага, Полацкага, Тураўскага Евангелляў, “Жыція Еўфрасінні Полацкай” і Баркулабаўскага летапісу, “Посах кіравання” Сімяона Полацкага, першага ў свеце Буквара, усёй вядомай спадчыны Францыска Скарыны.
Усе гэтыя выданні сталі пераможцамі і лаўрэатамі нацыянальнага конкурсу “Мастацтва кнігі” і аднайменнага міжнароднага конкурсу сярод краін – удзельніц СНД. На экспазіцыі таксама можна ўбачыць навуковыя выданні (у тым ліку шэраг выданняў да 500-годдзя беларускага кнігадрукавання, ваенна-патрыятычны выдавецкі праект “Партызанскі архіў” і г.д.), рэпрынтныя, электронныя выданні, паштоўкі і інш.
На працягу ўсіх дзён працы выстаўкі-кірмашу жадаючыя могуць азнаёміцца з прадстаўленымі выданнямі на стэндзе Нацыянальнай бібліятэкі Беларусі.
Таксама запрашаем на прэзентацыі нашых праектаў:
- “Новыя кнігі: па старонках беларускага друку” (да 60-годзя выдання) і кнігі “Беларусь вачыма бібліёграфа”
- інтэрнэт-праекта, прысвечанага 120-годдзю Уладзіміра Дубоўкі
- анлайн-конкурсу чытачоў “О, Беларусь, мая шыпшына!”
Прэзентацыі адбудуцца з 18.00 да 19.00 на цэнтральнай пляцоўцы Нацыянальнага стэнда Беларусі ў адміністрацыйным комплексе на пр. Пераможцаў, 14.
Далучайцеся да кніжнага фестывалю разам з намі!
Тэлефоны для даведак: (8 017) 293 28 81, 293 27 56.
Е-mail: pr@nlb.by
