Да 70-годдзя вызвалення Беларусі ад нямецка-фашысцкіх захопнікаў Нацыянальная бібліятэка Беларусі і кампанія “Мабільныя Тэлесістэмы” падрыхтавалі калекцыю электронных копій газет, часопісаў, плакатаў і лістовак перыяду Вялікай Айчыннай вайны.
У калекцыі выкарыстоўваліся дакументы, што захоўваюцца ў фондах Нацыянальнай бібліятэкі Беларусі. Гэта сапраўдныя выданні ваеннага часу, якія з’яўлялюцца гістарычным здабыткам нашага народа і вылучаюцца высокім узроўнем патрыятызму. У свой час гэтыя выданні служылі магутным сродкам далучэння насельніцтва да абароны Айчыны ад нямецка-фашысцкіх захопнікаў. У газетах, зваротах, плакатах і лістоўках расказвалася пра гераічную барацьбу Савецкай арміі, пра ваенныя аперацыі, навіны з фронту, услаўляліся подзвігі воінаў і работнікаў тылу, выкрывалася і высмейвалася нацысцкая прапаганда, выхоўвалася нянавісць да акупантаў.
Электронныя копіі газет, часопісаў, лістовак і плакатаў ваеннай пары з'яўляюцца для нас хронікай подзвігу нашага народа, даюць магчымасць адчуць атмасферу яго гераічнай барацьбы і глыбей асэнсаваць падзеі Вялікай Айчыннай вайны.
Азнаёміцца з калекцыяй гістарычных дакументаў можна на сайце мабільнай бібліятэкі МТС.