9 сакавіка ў Нацыянальнай бібліятэцы Беларусі адбылася публічная лекцыя “Статуты ВКЛ у кантэксце гісторыі права Беларусі”, прымеркаваная да Года гістарычнай памяці.
Экспертам выступіў кандыдат гістарычных навук, дацэнт кафедры гісторыі Беларусі старажытнага часу і сярэдніх вякоў гістарычнага факультэта Беларускага дзяржаўнага ўніверсітэта Уладзімір Падалінскі.
На лекцыі абмеркавалі ролю і змест статутаў ВКЛ, якія з’яўляюцца не толькі першымі фундаментальнымі зборамі прававых нормаў і выдатнымі творамі юрыдычнай думкі, але і найважнейшымі помнікамі старабеларускай мовы. Менавіта дзякуючы Першаму (1529), а потым Другому (1566) і Трэцяму (1588) статутам Вялікае Княства Літоўскае ўвайшло ў кола дзяржаў, у якіх права стала важным элементам рэгулявання грамадскага і дзяржаўнага жыцця.
Асаблівую цікавасць у прысутных выклікалі грамадскія дзеячы, якія ўдзельнічалі ў падрыхтоўцы дакументаў, – Астафій Валовіч, Леў Сапега, дзейнасць князёў Вялікага Княства Літоўскага, а таксама навуковыя працы знакамітых даследчыкаў Івана Лапы, Юліюша Бардаха і іншых.
Адукацыйная лекцыя “Статуты ВКЛ у кантэксце гісторыі права Беларусі” – завяршальная сустрэча з вядомымі навукоўцамі з цыкла “Крыніцы гістарычнай памяці”.
Запісы мінулых лекцый глядзіце на канале YouTube па адрасе https://www.youtube.com/c/BelarusBook/videos.
Матэрыял пададзены аддзелам сувязей з грамадскасцю.