30 студзеня ў галерэі “Лабірынт” адбылася літаратурна-творчая сустрэча “Вялікі талент, вялікая работа, вялікае сэрца”.
Мерапрыемства прайшло ў рамках адкрыцця кніжна-ілюстрацыйнай выстаўкі, прысвечанай лаўрэатам прэміі “За духоўнае адраджэнне” і спецыяльнай прэміі Прэзідэнта Рэспублікі Беларусь дзеячам культуры і мастацтва 2013 г.
Каб падкрэсліць грамадскую значнасць падзеі і павіншаваць тых, хто ўносіць свой уклад у высакародную справу ўмацавання духоўных каштоўнасцей, маральных традыцый, ідэй чалавекалюбства і міласэрнасці, Нацыянальная бібліятэка Беларусі штогод арганізуе кніжна-ілюстрацыйную выстаўку і праводзіць літаратурна-творчую сустрэчу “Вялікі талент, вялікая работа, вялікае сэрца” з удзелам лаўрэатаў прэмій. Сёлета на ёй прадстаўлены шматлікія матэрыялы пра ўсіх лаўрэатаў з розных калекцый бібліятэкі: кнігі, выяўленчыя матэрыялы, перыядычныя выданні.
Распачынаючы сустрэчу намеснік дырэктара Нацыянальнай бібліятэкі Беларусі Таццяна Кузьмініч адзначыла, што прэмія “За духоўнае адраджэнне” і спецыяльныя прэміі Прэзідэнта Рэспублікі Беларусь – гэта “наш нацыянальны Алімп”. “Мы разумеем, што да гэтага «Алімпу» кожны з вас ідзе доўгія гады, засяроджваючы ўвагу на пэўным кірунку дзейнасці. Нацыянальная бібліятэка Беларусі гасцінна адчыняе вам дзверы і заўсёды запрашае ў госці. Плёну вам у вашай працы!” – звярнулася яна да лаўрэатаў.
Пад час мерапрыемства пра сваю дарогу да “Алімпу” расказалі дырэктар Беларускага дзіцячага фонду Аляксандр Трухан, начальнік інспекцыі па справах непаўналетніх міліцыі грамадскай бяспекі ўпраўлення ўнутраных спраў Мінскага райвыканкама Вольга Чамаданава, прадстаўнікі аўтарскага калектыву дзіцячага тэлевізійнага музычнага конкурсу “Я спяваю!” Алена Лобач і Анжэла Мікульская, аўтарскі калектыў агенцтва тэлевізійных навін Нацыянальнай дзяржаўнай тэлерадыёкампаніі (Міхаіл Равуцкі, Алена Борматава і Марыя Жукава), народны вакальны ансамбль ветэранаў вайны, працы і Узброеных Сіл “Памяць сэрца” Рэспубліканскага палаца культуры ветэранаў (мастацкі кіраўнік – Галіна Мацяс).
“Калі працуеш – не чакаеш узнагароды за гэта. Але калі ты яе атрымліваеш – адчуваеш вялікую радасць, канешне. Я люблю дзяцей. З гэтай нагоды я і абрала сваю прафесію, – паведаміла гасцям галоўны ўрач Рэспубліканскай дзіцячай бальніцы медыцынскай рэабілітацыі Галіна Радзівонава, якая таксама з’яўляецца адной з тых, дзеля каго арганізавана сустрэча. – У маёй рабоце трэба мець галоўныя чалавечыя якасці: дабрыню, любоў і міласэрнасць, і ніхто гэта так не ацэніць, як дзеці”.
Сёлетнія лаўрэаты прайшлі шмат цяжкіх дарог, каб узысці на п’едэстал: адзін адвёў падлеткаў ад дрэннага жыццёвага шляху, другі дапамог вялікай колькасці дзяцей дакрануцца да сваёй мары, трэці прымусіў іх паверыць у саміх сябе, іншы літаральна разабраў гісторыю як пазл і склаў у новым для нас выглядзе, а нехта праз доўгія гады захаваў у сабе юнацкі задор і ўсім сэрцам спявае цяперашнім юнакам песні савецкіх салдат, што змагаліся супраць фашыстаў.
Экспазіцыя, прысвечаная лаўрэатам, размесціцца на кальцавым калідоры 2-га паверха бібліятэкі з 4 лютага па 3 сакавіка 2014 года.
Тэлефоны для даведак: (8 017) 293 27 56, 293 79 80.
Е-mail: pr@nlb.by