31 студзеня ў Нацыянальнай бібліятэцы Беларусі адбылася літаратурна-творчая сустрэча ў рамках адкрыцця кніжна-ілюстрацыйнай выстаўкі “Вялікі талент, вялікая праца, вялікае сэрца”.
Выстаўка прысвечана лаўрэатам прэміі "За духоўнае адраджэнне" і спецыяльнай прэміі Прэзідэнта Рэспублікі Беларусь дзеячам культуры і мастацтва 2011 года.
Гэтыя прэміі прысуджаюцца штогод за выдатныя творы літаратуры і мастацтва, актыўную падзвіжніцкую дзейнасць у гуманітарнай галіне, накіраваную на развіццё і ўмацаванне духоўных каштоўнасцей.
Нацыянальная бібліятэка Беларусі традыцыйна арганізавала выстаўку матэрыялаў са сваіх калекцый, прысвечаную лаўрэатам, якія сваім мастацтвам і плённай працай славяць нашу краіну. У экспазіцыю ўвайшлі кнігі, выяўленчыя матэрыялы (плакаты, фота), перыядычныя і электронныя выданні.
Гасцей выстаўкі і лаўрэатаў прэміі “За духоўнае адраджэнне” і спецыяльнай прэміі Прэзідэнта Рэспублікі Беларусь дзеячам культуры і мастацтва 2011 года вітаў начальнік упраўлення ўстаноў культуры і мастацтва Міністэрства культуры Рэспублікі Беларусь Вадзім Міхайлавіч Шчэрбіч.
Госці мерапрыемства пазнаёміліся з лаўрэатамі, даведаліся пра іх дзейнасць, праекты, планы, дасягненні.
Творчымі выступленнямі прысутных парадавалі ўзорны дзіцячы калектыў беларускай песні “Цернічка” мінскага Палаца культуры і спорту чыгуначнікаў і цымбалістка, лаўрэат міжнародных конкурсаў Вераніка Прадзед.
Кніжна-ілюстрацыйная выстаўка “Вялікі талент, вялікая праца, вялікае сэрца” будзе працаваць да 17 красавіка 2012 г. у кальцавым калідоры 2-га паверха Нацыянальнай бібліятэкі Беларусі.