28 студзеня ў Нацыянальнай бібліятэцы Беларусі прайшло адкрыццё кніжна-ілюстрацыйнай выстаўкі “Вялікі талент, вялікая работа, вялікае сэрца”.
У рамках мерапрыемства ладзілася творчая сустрэча з лаўрэатамі прэміі “За духоўнае адраджэнне” і спецыяльных прэмій Прэзідэнта Рэспублікі Беларусь дзеячам культуры і мастацтва 2009 года.
Прэмія “За духоўнае адраджэнне” і спецыяльная прэміі Прэзідэнта Рэспублікі Беларусь прысуджаюцца штогод за выдатныя творы літаратуры і мастацтва, актыўную падзвіжніцкую дзейнасць у гуманітарнай сферы, скіраваную на развіццё і ўмацаванне духоўных каштоўнасцей.
Нацыянальная бібліятэка Беларусі арганізавала кніжна-ілюстрацыйную выстаўку матэрыялаў са сваіх калекцый, прысвечаную лаўрэатам, якія сваім мастацтвам і плённай працай славяць нашу краіну. У экспазіцыю ўвайшлі кнігі, выяўленчыя матэрыялы (плакаты, фота, паштоўкі), ноты, перыядычныя і электронныя выданні.
Лаўрэатаў прэміі і гасцей выстаўкі вітаў дырэктар Нацыянальнай бібліятэкі Беларусі Р.С. Матульскі.
На ўрачыстым адкрыцці мерапрыемства былі прадэманстраваны фрагменты дакументальнага серыяла “Зямля беларуская”. Творчымі выступленнямі прысутных парадавалі ўдзельнікі заслужанага аматарскага калектыву-студыі сучаснага бальнага танца “Мара”; мужчынскага вакальнага ансамбля “Благовест” “Выдавецтва Беларускага Экзархата”; дырэктар Цэнтра культуры і народнай творчасці в. Вулька-1 Лунінецкага раёна Брэсцкай вобласці В.Ф. Мелюх; студэнты кафедры баяна і акардэона Беларускай дзяржаўнай акадэміі музыкі, лаўрэаты міжнародных конкурсаў П. Дараганаў і У. Плігоўка. Нацыянальныя касцюмы Беларусі розных гістарычных эпох прадэманстраваў калектыў Лідскага гісторыка-мастацкага музея. Свае мастацкія работы на выстаўцы прадставілі юныя таленты Беларусі – вучні Горацкай дзіцячай школы мастацкіх рамёстваў.
Кніжна-ілюстрацыйная выстаўка “Вялікі талент, вялікая работа, вялікае сэрца” будзе дзейнічаць да 15 сакавіка на кальцавым калідоры 2-га паверха Нацыянальнай бібліятэкі Беларусі.