5 кастрычніка ў віртуальнай чытальнай зале Нацыянальнай бібліятэкі Беларусі адбылася чарговая анлайн-сустрэча з прадстаўнікамі публічных бібліятэк нашай краіны. Мерапрыемства было прымеркавана да адкрыцця тэставага доступу да электронна-бібліятэчнай сістэмы “БиблиоРоссика”.
Для нашых калег быў падрыхтаваны анлайн-трэнінг па магчымасцях выкарыстання гэтага электроннага рэсурсу. Усе чытачы бібліятэк – удзельніц тэсціравання да 31 кастрычніка 2021 года змогуць без абмежаванняў знаёміцца з поўнымі тэкстамі вучэбнай, мастацкай і навукова-папулярнай літаратуры, прадстаўленай у ЭБС.
Доступ да ЭБС “БиблиоРоссика” адкрыты ў рамках вялікай серыі тэсціравання шэрагу вядучых інфармацыйных рэсурсаў, арганізаванай ВЧЗ спецыяльна для публічных бібліятэк Беларусі. Спадзяёмся, што гэтая акцыя будзе спрыяць поўнаму і якаснаму інфармацыйнаму абслугоўванню жыхароў усіх рэгіёнаў нашай краіны і дазволіць публічным бібліятэкам аптымізаваць падыходы да камплектавання сваіх дакументных фондаў.
Нагадваем, што ліцэнзійны доступ да ЭБС “БиблиоРоссика” на пастаяннай аснове адкрыты для ўсіх чытачоў Нацыянальнай бібліятэкі Беларусі.
Віртуальная чытальная зала запрашае бібліятэкі і ўсе зацікаўленыя арганізацыі да партнёрства па карпаратыўнай падпісцы на ліцэнзійныя базы даных.
Матэрыял пададзены аддзелам карпаратыўнага ўзаемадзеяння.