4 мая Нацыянальную бібліятэку Беларусі наведалі ветэраны Вялікай Айчыннай вайны.
Мерапрыемства адбылося ў рамках урачыстай сустрэчы старшыні Савета Рэспублікі Нацыянальнага сходу Рэспублікі Беларусь Барыса Батуры з ветэранамі, прысвечанай 65-й гадавіне Вялікай Перамогі.
Сярод гасцей бібліятэкі былі старшыні і актывісты гарадскіх і раённых арганізацый Беларускага грамадскага аб’яднання ветэранаў, якія прымалі ўдзел у Вялікай Айчыннай вайне і маюць высокія баявыя ўзнагароды.
У Нацыянальнай бібліятэцы Беларусі ветэранаў вітаў яе дырэктар Раман Матульскі. У ходзе агляднай экскурсіі госці азнаёміліся з работай бібліятэкі, архітэктурна-канструкцыйнымі асаблівасцямі яе будынка, тэхнічным аснашчэннем, інфармацыйнымі рэсурсамі, мастацкім афармленнем інтэр’ераў. Ветэраны вайны падняліся на закрытую аглядную пляцоўку бібліятэкі, адкуль яны змаглі палюбавацца маляўнічымі пейзажамі сталіцы і наваколля.
У музеі кнігі ўвазе гасцей была прадстаўлена калекцыя рарытэтных выданняў з фондаў Нацыянальнай бібліятэкі Беларусі.
 |
 |
 |
