27 лістапада бібліятэку наведалі ўдзельнікі пасяджэння Парламенцкай асамблеі парламенцкага вымярэння Цэнтральна-Еўрапейскай ініцыятывы.
Сёлета Беларусь упершыню прымае старшынства ў ЦЕІ, праграма якога ўключае больш за 20 мерапрыемстваў – канферэнцыі, сустрэчы, форумы на самым высокім узроўні. 28 лістапада ў Мінску адбудзецца пасяджэнне Парламенцкай асамблеі Цэнтральна-Еўрапейскай ініцыятывы. У ім возьмуць удзел кіраўнікі парламентаў 18 дзяржаў – членаў ЦЕІ.
Для ганаровых гасцей знаёмства з Беларуссю і яе сталіцай пачалося з наведвання найбуйнейшага сацыякультурнага цэнтра краіны.
Падчас экскурсіі дырэктар Нацыянальнай бібліятэкі Беларусі Раман Матульскі пазнаёміў членаў дэлегацыі з гісторыяй, архітэктурай і інфармацыйнымі рэсурсамі ўстановы. Госці наведалі найбольш значныя месцы бібліятэкі – Круглы і чытальныя залы, выставачныя галерэі, аглядную пляцоўку, а таксама пабывалі на міжнароднай выстаўцы “Францыск Скарына і яго эпоха”, прысвечанай 500-годдзю беларускага кнігадрукавання.