З 3 па 6 снежня супрацоўнікі Нацыянальнай бібліятэкі Беларусі ў рамках праекта Еўрапейскага саюза MOST (Mobility Scheme for Targeted People-to-People-Contacts), накіраванага на пашырэнне прафесійных кантактаў паміж грамадзянамі Еўрапейскага саюза і Беларусі, наведалі бібліятэкі г. Лейпцыга (Федэратыўная Рэспубліка Германія).
Дэлегацыя кіраўнікоў структурных падраздзяленняў абслугоўвання карыстальнікаў у складзе Знак Маргарыты Віктараўны, загадчыцы аддзела абслугоўвання афіцыйнымі дакументамі, Кісялёвай Юліі Алегаўны, загадчыцы аддзела суправаджэння інтэрнэт-партала, Скалабан Вольгі Аляксандраўны, загадчыцы аддзела міжбібліятэчнага абанемента і дастаўкі дакументаў, Тулупавай Алены Вячаславаўны, загадчыцы аддзела даведачна-інфармацыйнага абслугоўвання, і Хадасевіч Таццяны Анатольеўны, загадчыцы аддзела абслугоўвання спецыялізаванымі фондамі, наведалі Лейпцыгскае аддзяленне Нямецкай нацыянальнай бібліятэкі і Бібліятэку Лейпцыгскага ўніверсітэта.
У рамках візіту ў Бібліятэку Лейпцыгскага ўніверсітэта супрацоўнікі Нацыянальнай бібліятэкі Беларусі прынялі ўдзел у канферэнцыі Digital Humanities Day 2018 – штогадовым мерапрыемстве, якое збірае прадстаўнікоў розных арганізацый і ўстаноў культуры, адукацыі і іншых для папулярызацыі праектаў па алічбоўцы культурных і гістарычных каштоўнасцей і абмену вопытам. Удзел у канферэнцыі Digital Humanities Day дазволіла даведацца аб тэхналогіі і спосабах алічбоўкі аб’ектаў культурнай спадчыны Германіі і іншых краін Еўропы, прававых і тэхнічных аспектах іх выкарыстання.
Бібліятэка Лейпцыгскага ўніверсітэта мае некалькі філіялаў (аддзяленняў). У рамках прафесійнага візіту адбылося знаёмства з працай навуковай медыцынскай бібліятэкі (Medcine and Science Library), якая адкрыла свае дзверы для чытачоў у новым сучасным будынку ў лістападзе 2018 года, а таксама з Бібліятэкай Альберціна (Biblioteka Albertina) – галоўным адміністрацыйным корпусам універсітэцкай бібліятэкі і адначасова помнікам архітэктуры.
Арганізатар і куратар візіту ў бібліятэку Лейпцыгскага ўніверсітэта Сафія Манс-Зюсбрых правяла займальную экскурсію, расказаўшы пра гісторыю яе стварэння і наступнага аднаўлення пасля Другой сусветнай вайны, а таксама аб сучаснай рабоце бібліятэкі – сістэме абслугоўвання чытачоў з выкарыстаннем RFID-тэхналогій, арганізацыі бібліятэчнага абслугоўвання, камплектаванні і пераразмеркаванні фондаў бібліятэкі.
Падчас сустрэчы з дырэктарам бібліятэкі прафесарам Ульрыхам Шнайдэрам абмяркоўваліся пытанні віртуальнага абслугоўвання карыстальнікаў, стварэння віртуальных праектаў, падрыхтоўкі сацыякультурных мерапрыемстваў, арганізацыі ўліку бібліятэчнай работы.
Нямецкая нацыянальная бібліятэка мае па адным аддзяленні ў Франкфурце-на-Майне і Лейпцыгу. У ходзе азнаямленчага тура ў Лейпцыгскае аддзяленне, арганізаванага памочнікам дырэктара бібліятэкі Сандрай Баўмгарт, беларуская дэлегацыя пазнаёмілася з гісторыяй бібліятэкі, яе структурай і асноўнымі напрамкамі работы. Таксама адбылася рабочая сустрэча з прадстаўніком Музея кніг і кнігадрукавання Антрэ Вендлерам і кіраўніком музычнага архіву Рупрэхтам Лангерам, падчас якой калегі падзяліліся вопытам стварэння і работы сваіх аддзелаў. У сваю чаргу супрацоўнікі Нацыянальнай бібліятэкі расказалі пра беларускі вопыт віртуальнага абслугоўвання карыстальнікаў, што выклікала цікавасць у нямецкіх калег.
Супрацоўнік бібліятэкі Сандро Улман прадставіў прэзентацыю праграмнага прадукту, які дазваляе ў аўтаматычным рэжыме прысвойваць індэксы электронным дакументам. Праграма, дарэчы, ужо паспяхова выкарыстоўваецца ў Нямецкай нацыянальнай бібліятэцы.
Кіраўнік падраздзялення абслугоўвання і кіравання калекцыямі Йюрг Раўбер расказаў пра сістэму абслугоўвання чытачоў у Нямецкай нацыянальнай бібліятэцы, а таксама пра асаблівасці арганізацыі захоўвання і выкарыстання калекцый друкаваных і электронных дакументаў.
