18 верасня для настаўнікаў беларускай мовы з Польшчы ў бібліятэцы ў межах семінара “Актуальныя пытанні вывучэння сучаснай беларускай мовы” былі арганізаваны музейныя заняткі. Сустрэча была ініцыіравана Акадэміяй паслядыпломнай адукацыі.
Польскія настаўнікі пазнаёміліся з асноўнымі кнігазнаўчымі праектамі, рэалізаванымі Нацыянальнай бібліятэкай за апошнія гады ў сферах навуковай, выдавецкай і музейнай дзейнасці. Былі прадстаўлены праекты па факсімільным узнаўленні: “Кніжная спадчына Францыска Скарыны” (2013–2017), “Першы «Буквар»: да 400-годдзя выдання” (2018) і “Берасцейская Біблія”(2019). Выданні сталі візітнай карткай Беларусі, прадстаўляючы яе ўсяму свету як краіну са старажытнай гісторыяй і багатай культурай. Дзякуючы праекту шырокая грамадскасць мае магчымасць пазнаёміцца з каштоўным пластам нашай культурнай спадчыны. Выданні з’яўляюцца базавай крыніцай для навуковых даследаванняў, перш за ўсё для гістарычных, філалагічных, культуралагічных і кнігазнаўчых. Для ўдзельнікаў семінара была прадстаўлена таксама методыка выкарыстання факсімільных выданняў з мэтамі адукацыі і выхавання.
Для настаўнікаў беларускай мовы быў прэзентаваны праект “У госці да кніг”, галоўнымі задачамі якога з’яўляюцца: прыцягненне дзяцей да актыўнага вывучэння беларускай кніжнай спадчыны, стварэнне асаблівых педагагічных умоў, якія дапамагаюць спазнаць, інтэлектуальна і творча пераасэнсаваць асаблівасці беларускай кніжнай культуры. Удзельнікі пазнаёміліся з методыкай арганізацыі заняткаў, якія праводзяцца ў музеі кнігі для дзяцей на беларускай мове.
Матэрыял прадастаўлены навукова-даследчым аддзелам кнігазнаўства.