28 верасня ў рамках візіту ў Рэспубліку Беларусь Нацыянальную бібліятэку Беларусі наведаў міністр культуры Літоўскай Рэспублікі Арунас Гелунас.
Спадар Гелунас знаходзіўся ў Беларусі па запрашэнні Міністэрства культуры Рэспублікі Беларусь. Праграма візіту міністра культуры Літоўскай Рэспублікі ўключала сустрэчу з міністрам культуры Рэспублікі Беларусь Паўлам Латушкам, наведванне ўнікальных помнікаў архітэктуры Беларусі – Лідскага, Мірскага, Нясвіжскага замкаў і Нацыянальнай бібліятэкі Беларусі.
У Нацыянальнай бібліятэцы Беларусі гасцей сустракаў яе дырэктар Раман Матульскі. Для дэлегацыі Літоўскай Рэспублікі ладзілася экскурсія па галоўнай інтэлектуальнай скарбніцы Беларусі. Госці азнаёміліся з работай бібліятэкі, архітэктурна-канструкцыйнымі асаблівасцямі яе будынка, тэхнічным аснашчэннем і інфармацыйнымі рэсурсамі. Члены дэлегацыі падняліся на адкрытую аглядную пляцоўку, адкуль ім адкрыўся маляўнічы пейзаж сталіцы і наваколля.
У музеі кнігі ўвазе гасцей была прадстаўлена калекцыя рарытэтных выданняў з фондаў Нацыянальнай бібліятэкі Беларусі. Спадар Гелунас пакінуў памятны запіс у Кнізе ганаровых гасцей.
Падчас наведвання Нацыянальнай бібліятэкі Беларусі адбыўся падыход да прэсы міністра культуры Літоўскай Рэспублікі Арунаса Гелунаса і міністра культуры Рэспублікі Беларусь Паўла Латушкі.