25 кастрычніка ў рамках афіцыйнага візіту ў Рэспубліку Беларусь Нацыянальную бібліятэку Беларусі наведала казахстанская парламенцкая дэлегацыя.
Дэлегацыю ўзначальваў старшыня мажыліса парламента Рэспублікі Казахстан У.Б. Мухамеджанаў.
У Нацыянальнай бібліятэцы Беларусі гасцей сустракала першы намеснік дырэктара па абслугоўванні карыстальнікаў і ідэалогіі Алена Далгаполава.
Для членаў дэлегацыі была арганізавана аглядная экскурсія, падчас якой яны азнаёміліся з работай бібліятэкі, архітэктурна-канструкцыйнымі асаблівасцямі яе будынка, тэхнічным абсталяваннем, інфармацыйнымі рэсурсамі, мастацкім афармленнем інтэр’ераў.
Экскурсія прадоўжылася на адкрытай агляднай пляцоўцы бібліятэкі, адкуль адкрываецца маляўнічы від на сталіцу і наваколле.
У музеі кнігі ўвазе гасцей была прадстаўлена калекцыя рарытэтных выданняў з фондаў Нацыянальнай бібліятэкі Беларусі. Спадар Мухамеджанаў пакінуў памятны запіс у Кнізе ганаровых гасцей.