12 ліпеня ў рамках афіцыйнага візіту ў Рэспубліку Беларусь Нацыянальную бібліятэку Беларусі наведала грузінская парламенцкая дэлегацыя.
Узначаліў дэлегацыю старшыня Камітэта па еўраінтэграцыі парламента Грузіі Давід Дарчыяшвілі.
У Нацыянальнай бібліятэцы Беларусі дэлегацыю вітаў дырэктар Раман Матульскі.
У ходзе агляднай экскурсіі па Нацыянальнай бібліятэцы госці азнаёміліся з яе работай, архітэктурна-канструкцыйнымі асаблівасцямі будынка, тэхнічным аснашчэннем, інфармацыйнымі рэсурсамі, мастацкім афармленнем інтэр’ераў. Члены дэлегацыі падняліся на закрытую аглядную пляцоўку бібліятэкі, адкуль ім адкрыўся маляўнічы пейзаж сталіцы і наваколля.
У музеі кнігі ўвазе гасцей была прадстаўлена калекцыя рарытэтных выданняў з фондаў Нацыянальнай бібліятэкі Беларусі. Напрыканцы сустрэчы старшыня Камітэта па еўраінтэграцыі парламента Грузіі Давід Дарчыяшвілі пакінуў памятны запіс у Кнізе ганаровых гасцей. Дырэктар Нацыянальнай бібліятэкі Беларусі ўручыў спадару Дарчыяшвілі падарункі.