19 чэрвеня 2009 года Нацыянальную бібліятэку Беларусі наведалі дэлегацыя Міністэрства замежных спраў Рэспублікі Беларусь і Міністэрства замежных спраў Літоўскай Рэспублікі.
Беларускую дэлегацыю ўзначальваў Надзвычайны і Паўнамоцны Пасол Рэспублікі Беларусь у Літоўскай Рэспубліцы і Фінляндскай Рэспубліцы У. Дражын, літоўскую дэлегацыю – віцэ-міністр замежных спраў Літоўскай Рэспублікі Э. Ігнатавічус.
Візіт адбыўся ў рамках кансультацый паміж міністэрствамі замежных спраў, якія праходзілі ў г. Мінску 18–19 чэрвеня 2009 года.
Члены дэлегацый даведаліся пра асноўныя кірункі дзейнасці бібліятэкі, яе інфармацыйныя рэсурсы, тэхнічнае абсталяванне, структуру чытальных залаў, сістэму абслугоўвання чытачоў, архітэктурныя асаблівасці будынка і афармленне інтэр’ераў. З вышыні агляднай пляцоўкі госці мелі магчымасць палюбавацца панарамным відам сталіцы. У музеі кнігі члены дэлегацый пазнаёміліся з калекцыяй рарытэтаў з фондаў Нацыянальнай бібліятэкі Беларусі.
Ад імя Міністэрства замежных спраў Літоўскай Рэспублікі Э. Ігнатавічус пакінуў памятны запіс у кнізе ганаровых гасцей, выказаўшы сваю ўдзячнасць за цудоўную экскурсію і магчымасць агледзець будынак бібліятэкі, пазнаёміцца з яе працай. Спадар Ігнатавічус пажадаў калектыву бібліятэкі поспехаў у прафесійнай дзейнасці і “новых, такіх жа захапляльных, праектаў”.
Фонды Нацыянальнай бібліятэкі Беларусі папоўніліся новым выданнем па гісторыі Літвы – кнігай літоўскага гісторыка, доктара гістарычных навук, прафесара Э. Гудавічуса, якую спадар віцэ-міністр паднёс бібліятэцы ў дарунак.
 |
 |
 |
 |
 |
 |
