29 лістапада Нацыянальную бібліятэку Беларусі наведала афіцыйная дэлегацыя Турэцкай Рэспублікі.
Візіт адбыўся ў рамках Дзён культуры Турцыі ў Рэспубліцы Беларусь, якія праходзяць у сталіцы з 26 па 30 лістапада 2017 года.Культурная праграма ўключае каля дзесяці мерапрыемстваў: турэцкая опера, народныя танцы, тэматычныя канцэрты і фотавыстаўкі. У гэтыя дні не толькі беларусы знаёмяцца з каларытнай турэцкай культурай, але і госці з сонечнай краіны адкрываюць для сябе самабытную Беларусь.
Падчас агляднай экскурсіі для турэцкай дэлегацыі дырэктар Нацыянальнай бібліятэкі Беларусі Раман Матульскі расказаў пра гісторыю, інфармацыйныя рэсурсы і тэхнічныя магчымасці ўстановы, пазнаёміў з архітэктурай і інтэр’ерамі будынка.
Дакрануцца да кніжнай спадчыны Беларусі госці змаглі падчас наведвання міжнароднай выстаўкі “Францыск Скарына і яго эпоха”. Экспазіцыя, прысвечаная 500-годдзю беларускага кнігадрукавання, наглядна адлюстроўвае вехі гісторыі айчыннага і еўрапейскага кнігадрукавання. На выстаўцы госці пабачылі як арыгінальныя кнігі Францыска Скарыны, так і каштоўныя выданні XV–XVII стагоддзяў, прывезеныя з сямі краін свету.
Напрыканцы сустрэчы бакі абмяняліся памятнымі падарункамі.