7–8 снежня адбыўся візіт афіцыйнай дэлегацыі Рэспублікі Карэлія ў Рэспубліку Беларусь.
З прафесійным візітам Нацыянальную бібліятэку Беларусі наведалі супрацоўнікі Нацыянальнай бібліятэкі Рэспублікі Карэлія – намеснік дырэктара па бібліятэчнай рабоце Ірына Германава і намеснік дырэктара па тэхнічнай эксплуатацыі Арцём Арцёмаў.
Намеснік генеральнага дырэктара – дырэктар па інфармацыйных рэсурсах і абслугоўванні карыстальнікаў Нацыянальнай бібліятэкі Беларусі Віктар Пшыбытка і намеснік генеральнага дырэктара – дырэктар па эканоміцы, рэжыме, эксплуатацыі будынка і абсталявання Нацыянальнай бібліятэкі Беларусі Станіслаў Каспяровіч сустрэліся з калегамі і абмяняліся вопытам па кірунках сваёй дзейнасці.
Ганаровых гасцей чакала насычаная праграма. Для іх правялі азнаямленчую экскурсію, падчас якой былі прадэманстраваны магчымасці бібліятэкі як інфармацыйнага і сацыякультурнага цэнтра. Загадчыца аддзела кнігасховішча Наталля Маргачова падрабязна апісала арганізацыю фондаў, размяшчэнне дакументаў у кнігасховішчы, умовы захоўвання і паказала працу транспартнай сістэмы “тэлеліфт”. Загадчыца аддзела рэстаўрацыі і кансервацыі бібліятэчных дакументаў Дзіяна Муратава распавяла аб дзейнасці свайго аддзела, а начальнік інфармацыйнага цэнтра Ала Шарамецьева азнаёміла гасцей з электроннымі інфармацыйнымі рэсурсамі Нацыянальнай бібліятэкі Беларусі.
Цікавіла расійскіх калег таксама тэма мадэрнізацыі гарадскіх і сельскіх бібліятэк Беларусі, падрабязнасці якой патлумачыла загадчыца сектара маніторынгу і каардынацыі дзейнасці бібліятэк навукова-даследчага аддзела бібліятэказнаўства Анастасія Маслоўская.
Заключным этапам прафесійнага візіту стала абмеркаванне пытанняў захоўвання і экспанавання кніжных помнікаў з загадчыцай навукова-даследчага аддзела кнігазнаўства Марыяй Шопінай.
8 снежня Нацыянальную бібліятэку Беларусі наведалі члены ўрада Рэспублікі Карэлія – міністр культуры Рэспублікі Карэлія Аляксей Лесанен і намеснік прэм’ер-міністра ўрада Рэспублікі Карэлія па сацыяльных пытаннях Ларыса Падсаднік.
Ганаровых гасцей пазнаёмілі са 100-гадовай гісторыяй Нацыянальнай бібліятэкі Беларусі, архітэктурнымі асаблівасцямі і тэхнічнымі магчымасцямі ўстановы, расказалі аб інфармацыйных рэсурсах і сацыякультурнай дзейнасці бібліятэкі, а таксама правялі экскурсію з наведваннем музея кнігі і агляднай пляцоўкі з цудоўнай панарамай зімовай беларускай сталіцы.
Падчас сустрэчы прадстаўнікі беларускага і расійскага бакоў абмяняліся каштоўным вопытам, уручылі адзін аднаму памятныя падарункі і выказалі надзею на плённае супрацоўніцтва.
Матэрыял пададзены аддзелам сувязей з грамадскасцю.
