Запрашаем наведаць тэатральную старонку навігатара “Беларусь у інфармацыйнай прасторы”. Тут вы знойдзеце інфармацыю аб музычных, драматычных, лялечных і іншых тэатрах Рэспублікі Беларусь, якія ставяць спектаклі для гледачоў розных узростаў: ад 3-х да 103-х гадоў.
Гэтай восенню адразу некалькі тэатральных устаноў нашай краіны адкрылі юбілейныя сезоны. Адзін з найстарэйшых беларускіх тэатраў – Нацыянальны акадэмічны тэатр імя Янкі Купалы праз год будзе святкаваць 100-годдзе з дня афіцыйнага заснавання. Але свае сустрэчы з гледачом тэатр пачаў раней гэтай даты, таму сёння на яго сайце можна ўбачыць надпіс – “100 сезон”.
У 75-ы раз адкрылі свае дзверы перад аматарамі тэатральнага мастацтва Брэсцкі акадэмічны тэатр драмы і Магілёўскі абласны тэатр драмы і камедыі імя У.І. Дуніна-Марцінкевіча ў Бабруйску. Круглую дату (80-годдзе) адзначае і Гомельскі абласны драматычны тэатр. Дарэчы, у пачатку снежня тут пройдзе XIV Міжнародны фестываль тэатральнага мастацтва “Славянскія тэатральныя сустрэчы”, на старонку якога можна перайсці таксама з раздзела “Міжнародныя мерапрыемствы ў Беларусі. IV квартал 2019 года” сайта “Беларусь у інфармацыйнай прасторы”.
Віртуальная чытальная зала нагадвае, што інфармацыя аб беларускім тэатры (падраздзел “Тэатральнае мастацтва”) размешчана ў раздзеле “Культура і мастацтва” вэб-навігатара. Вы можаце не толькі пазнаёміцца з разнастайнасцю тэатральнага жыцця краіны, але, перайшоўшы па спасылцы на сайт тэатра, выбраць для сябе цікавы спектакль і купіць квіток у анлайн-касе.
Матэрыял прадастаўлены аддзелам карпаратыўнага ўзаемадзеяння.
