21 і 22 лютага прадстаўнікі Нацыянальнай бібліятэкі Беларусі сумесна з супрацоўнікамі кампаніі “Электронна-бібліятэчная сістэма «Лань»” правялі некалькі мерапрыемстваў у ВНУ Гомеля і Гомельскай абласной бібліятэцы. Гэта працяг серыі семінараў, якія пачаліся ў Брэсце.
У Гомельскім дзяржаўным універсітэце імя Ф. Скарыны і Гомельскім дзяржаўным тэхнічным універсітэце імя П.В. Сухога для выкладчыкаў, аспірантаў, студэнтаў і супрацоўнікаў універсітэцкіх бібліятэк быў прадстаўлены рэпертуар рэсурсаў віртуальнай чытальнай залы (ВЧЗ) для інфармацыйнага забеспячэння вышэйшай адукацыі і навукі. Руслан Доўгі, спецыяліст аддзела карпаратыўнага ўзаемадзеяння Нацыянальнай бібліятэкі Беларусі, распавёў пра магчымасці сумеснага набыцця бібліятэкамі краіны ліцэнзійных баз даных лепшых сусветных агрэгатараў і выдаўцоў, падыходы да арганізацыі іх тэставання і т.д.
Святлана Шнурава, намеснік дырэктара кампаніі “ЭБС «Лань»”, правяла трэнінг па выкарыстанні магчымасцей ЭБС у навучальным працэсе, падрабязна расказала пра кантэнт базы даных і прынцыпы яго фарміравання. Асаблівая ўвага была ўдзелена развіццю спецыяльнага сэрвісу для інклюзіўнай адукацыі, а таксама рэсурсаў адкрытага доступу на платформе дадзенай ЭБС. Бібліятэкарам былі прадстаўлены новыя сэрвісы і магчымасці асабістага кабінета адміністратара сістэмы.
Слухачам семінара ў Гомельскай абласной універсальнай бібліятэцы імя У.І. Леніна – супрацоўнікам бібліятэкі і прадстаўнікам Гомельскай гарадской ЦБС – былі прадэманстраваны магчымасці лічбавага камплектавання інфармацыйнымі рэсурсамі ВЧЗ і перспектывы папулярызацыі праз ВЧЗ рэсурсаў уласнай генерацыі.
Таксама быў прэзентаваны тэматычны сайт Нацыянальнай бібліятэкі “Беларусь у інфармацыйнай прасторы” – адзіны пункт доступу да самых аўтарытэтных беларускіх электронных інфармацыйных рэсурсаў і грамадска-значнай інфармацыі пра Беларусь для дзелавых, грамадскіх і навуковых колаў, беларускай дыяспары.
Электронныя інфармацыйныя рэсурсы – неад'емная частка навуковага і адукацыйнага працэсу ў сучасным свеце. Таму забеспячэнне бібліятэк нашай краіны лепшымі сусветнымі электроннымі базамі даных – галоўная задача ВЧЗ Нацыянальнай бібліятэкі Беларусі.
Матэрыял прадастаўлены аддзелам карпаратыўнага ўзаемадзеяння.
