21–23 студзеня ў Вільнюсе (Літоўская Рэспубліка) адбылася міжнародная навуковая канферэнцыя “Вільнюскае кірылічнае кнігадрукаванне ў кантэксце Еўропы: даследаванні і адкрыцці”, прысвечаная гісторыі кірылічнага кнігадрукавання.
У канферэнцыі, якая прайшла ў Бібліятэцы Вільнюскага ўніверсітэта, удзельнічалі даследчыкі, вучоныя, бібліятэкары з Расійскай дзяржаўнай бібліятэкі (г. Масква), Расійскай нацыянальнай бібліятэкі (г. Санкт-Пецярбург), Вармінска-Мазурскага ўніверсітэта (г. Ольштын, Польшча), Нацыянальнай бібліятэкі Балгарыі (г. Сафія), Карлава ўніверсітэта (г. Прага, Чэхія), Нацыянальнай бібліятэкі Украіны імя У.І. Вярнадскага (г. Кіеў), Бібліятэкі Вільнюскага ўніверсітэта, царквы Св. Параскевы (г. Вільнюс).
У рабоце канферэнцыі ўзяла ўдзел загадчыца НДА кнігазнаўства Нацыянальнай бібліятэкі Беларусі Кірэева Г.У., якая выступіла з дакладам “Гісторыя фарміравання калекцыі кніг кірылаўскага друку Нацыянальнай бібліятэкі Беларусі”.
Да правядзення канферэнцыі была прымеркавана прэзентацыя каталога “Калекцыя старадрукаваных кірылічных кніг Бібліятэкі Вільнюскага ўніверсітэта, 1525–1839”, якая, як і падрыхтаваная супрацоўнікамі бібліятэкі выстаўка “Наги бо все без книг языцы”, дзе была прадстаўлена калекцыя кірылічных кніг з фондаў бібліятэкі, праходзіла ў зале Ф. Смуглевіча.