24 лістапада супрацоўнікі бібліятэкі прынялі ўдзел у міжнароднай відэаканферэнцыі “Шляхі развіцця бібліятэк Садружнасці за 25 гадоў”.
У мерапрыемстве таксама ўдзельнічалі кіраўнікі і спецыялісты Расійскай дзяржаўнай бібліятэкі, Нацыянальнай акадэмічнай бібліятэкі Рэспублікі Казахстан і Нацыянальнай бібліятэкі Узбекістана імя Алішэра Наваі.
Арганізатарам канферэнцыі выступіла некамерцыйнае партнёрства “Бібліятэчная асамблея Еўразіі”.
Галіна Анатольеўна Райкова, загадчыца аддзела міжбібліятэчнага ўзаемадзеяння з бібліятэкамі Расіі і СНД Расійскай дзяржаўнай бібліятэкі, генеральны дырэктар некамерцыйнага партнёрства “Бібліятэчная асамблея Еўразіі”, павітала ўдзельнікаў і прадставіла кароткі агляд дзейнасці нацыянальных бібліятэк краін СНД.
Дасягненні бібліятэчнай галіны Рэспублікі Беларусь за мінулыя 25 гадоў асвятліла ў сваім выступленні Марына Георгіеўна Пшыбытка, загадчыца навукова-даследчага аддзела бібліятэказнаўства Нацыянальнай бібліятэкі Беларусі.
Пра развіццё інфармацыйна-бібліятэчнай сферы Рэспублікі Узбекістан расказала Вераніка Сяргееўна Палякова, кіраўнік навукова-метадычнай і даследчай службы Нацыянальнай бібліятэкі Узбекістана імя Алішэра Наваі.
Рустам Абдрашытавіч Ахметжанаў, інжынер-праграміст службы ўпраўлення электроннымі рэсурсамі Нацыянальнай акадэмічнай бібліятэкі Рэспублікі Казахстан, апісаў праекты, якія рэалізуюцца ў бібліятэках краіны.
Удзельнікі падзяліліся назапашаным вопытам, абмеркавалі далейшыя шляхі ўзаемадзеяння і падкрэслілі неабходнасць развіцця супрацоўніцтва бібліятэк краін СНД, у тым ліку пасродкам правядзення сумесных мерапрыемстваў у анлайн-рэжыме.
 |
 |
