17 студзеня ў Нацыянальнай бібліятэцы прайшоў творчы вечар “Ветразь лёсу” беларускага пісьменніка, заслужанага дзеяча культуры Рэспублікі Беларусь Навума Гальпяровіча з нагоды яго 75-гадовага юбілею.
На творчым рахунку вядомага паэта, публіцыста, тэлевядучага, радыёжурналіста больш за 10 кніг паэзіі і прозы, яго вершы пакладзены на музыку вядомымі беларускімі кампазітарамі – Э. Зарыцкім, У. Буднікам, А. Елісеенкавым, В. Івановым. У сваіх аўтарскіх праграмах на тэлебачанні ён уздымае актуальныя пытанні культуры і гісторыі Беларусі, сустракаецца са знакамітымі грамадскімі і культурнымі дзеячамі краіны.
Выказаць падзяку Навуму Якаўлевічу за літаратурную творчасць, па вартасці ацаніць яго ўлад у развіццё беларускай культуры, павіншаваць з юбілеем сабраліся калегі, сябры і госці. З цёплымі словамі да прысутных звярнуліся намеснік генеральнага дырэктара Нацыянальнай бібліятэкі Беларусі Віктар Пшыбытка; акцёр i рэжысёр Нацыянальнай тэлерадыёкампаніі, пастаноўшчык радыёспектакляў Алег Вінярскі; рэдактар праграмы “Суразмоўцы” на тэлеканале “Беларусь 3”, кіраўнік народнага літаратурнага тэатра “Жывое слова” Алесь Мойскі, вядомыя беларускія тэле- і радыёвядучыя, прыхільнікі творчасці Навума Гальпяровіча.
На творчым вечары Навум Якаўлевіч падзяліўся ўспамінамі аб яркіх і запамінальных момантах сваёй біяграфіі, расказаў пра гісторыю стварэння твораў і адказаў на шматлікія пытанні прысутных. На працягу мерапрыемства гучалі запісы песень на словы паэта. Цёплую атмасферу сустрэчы надалі выступленні Алеся Мойскага і Алега Вінярскага, якія прадэкламавалі вершы юбіляра.
На мерапрыемстве была прадстаўлена выстаўка-прагляд выданняў з фонду Нацыянальнай бібліятэкі Беларусі, якая адлюстроўвае шматгранны творчы шлях пісьменніка.
Матэрыял пададзены аддзелам сувязей з грамадскасцю.
