І зноў у дарогу запрашае віртуальная чытальная зала. На гэты раз мэта падарожжа – Магілёўскі край і сапраўды малая радзіма.
“Мой родны кут, як ты мне мілы!..”
Якуб Колас
Віртуальная спасылка перанясе вас у базу даных “Вёсачкі з вялікай гісторыяй”, размешчаную на сайце Магілёўскай абласной бібліятэкі імя У.І. Леніна. У Год малой радзімы рэсурс прапануе пазнаёміцца з некаторымі вёсачкамі і мястэчкамі, вядомымі сваімі архітэктурнымі шэдэўрамі, прыроднымі аб’ектамі або дзейнасцю знакамітых ураджэнцаў.
Нядаўна створаная база даных – “Вёсачкі з вялікай гісторыяй” – даступна на старонцы “Электронныя інфармацыйныя рэсурсы віртуальнай чытальнай залы. Рэсурсы арганізацый – партнёраў Нацыянальнай бібліятэкі Беларусі”. З яе можна даведацца пра ўнікальныя факты гісторыі і культуры Беларусі, зірнуць на іх праз прызму малой, але вельмі дарагой сэрцу чалавека радзімы.
Да прыкладу, ці ведаеце вы, якое збудаванне спраектаваў і пабудаваў знакаміты Растрэлі – той самы, які з’яўляецца архітэктарам Зімовага палаца ў Санкт-Пецярбургу? Дзе знаходзіцца адзін з лепшых палацава-паркавых ансамблей Беларусі ХІХ стагоддзя, які таксама называюць беларускім Версалем? Дзе ўзведзена “круглая” царква – паменшаная ў 32 разы копія сабора Святога Пятра ў Рыме? У якой з вёсак захаваўся старажытны абрад “Закліканне дажджу”, а ў якой праводзіцца свята радзімічаў? Дзе размешчаны ўнікальныя прыродныя аб’екты, якія знаходзяцца пад дзяржаўнай і міжнароднай аховай? Таксама цікава будзе даведацца пра тое, якія дзеянні на карысць малой радзімы здзейснілі вядомыя персоны: нашчадкі роду А.С. Пушкіна, генерал царскай арміі М.Р. Чарняеў, ваенны інжынер Я. Жылінскі, браты і сёстры Лепяшынскія, браты Дараганы, Я.І. Бараноўскі.
Такім чынам, здзейсніце інтэрнэт-падарожжа па вёсачках Магілёўшчыны! Спадзяёмся, што віртуальны тур падштурхне вас наведаць гэтыя цікавыя месцы і на свае вочы пераканацца ў непаўторнасці культурнай спадчыны Беларусі нават у аддаленых яе кутках. А бібліятэкараў краіны заклікаем больш актыўна ўключацца ў прэзентацыю сваёй малой радзімы на старонках віртуальнай чытальнай залы Нацыянальнай бібліятэкі Беларусі.
Матэрыял прадастаўлены аддзелам карпаратыўнага ўзаемадзеяння.
