Напярэдадні 975-годдзя Навагрудка віртуальная чытальная зала прапануе ўвазе карыстальнікаў інфармацыйныя рэсурсы, якія адлюстроўваюць веліч гэтага старажытнага беларускага горада.
Створаныя Навагрудскай раённай бібліятэкай рэсурсы дапамогуць пазнаёміцца з адным з найважнейшых гістарычных цэнтраў Беларусі і яго славутымі людзьмі.
База даных “Навагрудак у выўленчым мастацтве” змяшчае алічбаваныя фотакопіі шматлікіх твораў пра горад, якія прадстаўляюць у гістарычнай і сучаснай прасторы яго вобразы: краявіды, гістарычныя падзеі, персанажаў, захаваныя і страчаныя помнікі дойлідства. Маецца таксама інфармацыя пра аўтараў – беларускіх і замежных мастакоў, у тым ліку землякоў. Уключаны і алічбаваныя творчыя работы навучэнцаў адукацыйных устаноў Навагрудка.
Рэсурс “Персаналіі Навагрудскага краю” змяшчае інфармацыю пра ўраджэнцаў Навагрудка і Навагрудчыны, выдатных асоб, якія сваімі дасягненнямі ў розных сферах дзейнасці ўславілі горад і Навагрудскі край.
Аматары гісторыі і краязнаўства, дойлідства і выяўленчага мастацтва атрымаюць не толькі інфармацыю, але і яркія эмацыйныя ўражанні ад віртуальнага знаёмства з горадам, які быў сэрцам Вялікага Княства Літоўскага. Жадаючыя змогуць праверыць свае веды аб горадзе, краі і гісторыі Беларусі з дапамогай тэстаў.
Віртуальная чытальная зала жадае вам цікавага і займальнага падарожжа.
Матэрыял прадастаўлены аддзелам карпаратыўнага ўзаемадзеяння.