20 мая ў галерэі “Панарама” Нацыянальнай бібліятэкі Беларусі адбылося ўрачыстае адкрыццё выстаўкі жывапісу і камп’ютарнай графікі “Васілёк у новым фармаце”, прысвечанай Дню аховы дзяцей.
Гэта сумесны праект Нацыянальнай бібліятэкі Беларусі, упраўлення адукацыі Мінскага аблвыканкама і Мінскай абласной спецыяльнай агульнаадукацыйнай школы-інтэрната для дзяцей з парушэннем слыху п. Ждановічы.
На выстаўцы прадстаўлены работы выхаванцаў студыі выяўленчага мастацтва “Васілёк» школы-інтэрната для дзяцей з парушэннем слыху.
Гасцей вернісажу і ўдзельнікаў выстаўкі вітала в.а. дырэктара Нацыянальнай бібліятэкі Беларусі Л.Г. Кірухіна. На мерапрыемстве таксама выступілі дырэктар Мінскай абласной спецыяльнай агульнаадукацыйнай школы-інтэрната для дзяцей з парушэннем слыху В.І. Гардынец, кіраўнік выяўленчай студыі “Васілёк” Н.Е. Пракаповіч, прадстаўнікі Міністэрства адукацыі Рэспублікі Беларусь, упраўлення адукацыі Мінскага абласнога выканаўчага камітэта, Мінскага абласнога камітэта Беларускага прафсаюза работнікаў адукацыі і навукі, Беларускага таварыства глухіх, прадстаўнік Каардынацыйнага савета расійскіх суайчыннікаў пры Пасольстве Расійскай Федэрацыі ў Рэспубліцы Беларусь.
Сваёй творчасцю прысутных парадавалі калектыў "Крынічка” ждановіцкай школы-інтэрната з песняй у жэставым выкананні, народны тэатр пантамімы “Рух” і музыкант-віртуоз Павел Неўмяржыцкі.
Выстаўка будзе доўжыцца да 3 чэрвеня ў галерэі “Панарама” (22-гі паверх, закрытая аглядная пляцоўка). Уваход на выстаўку платны. Плата за ўваход складае кошт наведвання агляднай пляцоўкі.
 |
 |
 |
 |
 |
 |
