21 лістапада ў Віцебскай абласной бібліятэцы адбылася V Міжнародная навукова-практычная канферэнцыя “Віцебскі край”, прысвечаная Году малой радзімы.
Пленарнае пасяджэнне было прысвечана першай у Расіі гравіраванай ілюстраванай Бібліі, створанай выхадцам Дуброўна Васілём Коранем. Па гэтай тэме выступілі прэзідэнт Акадэміі народнага мастацтва Віктар Пензін (г. Масква), мастацтвазнаўца, вядучы метадыст па народным сцэнічным касцюме аддзела традыцыйнай культуры Віцебскага абласнога метадычнага цэнтра народнай творчасці Людміла Вакар, намеснік старшыні абласнога савета ветэранаў, краязнаўца Міхаіл Ляшчынскі. Таксама быў зачытаны даклад мастацтвазнаўцы, аўтара кнігі “Народная гравіраваная кніга Васіля Кораня 1692–1696” Антаніны Саковіч (г. Масква).
Плённа прайшла работа секцый “Гістарычнае краязнаўства”, “Мастацтвазнаўства. Культурна-асветніцкія ўстановы ў сістэме сучаснага краязнаўства”, “Літаратурнае краязнаўства. Установы адукацыі ў сістэме сучаснага краязнаўства”, круглага стала “Рэлігійнае краязнаўства: хрысціянская спадчына Віцебшчыны”. Прагучала шмат цікавых дакладаў.
Ад Нацыянальнай бібліятэкі Беларусі ў працы канферэнцыі прыняў удзел галоўны бібліёграф навукова-даследчага аддзела бібліяграфіі Андрэй Бараноўскі з дакладам “Імгненні жыцця беларускага фотамастака: да 85-годдзя Мікалая Аляксеевіча Шарая”.
Па выніках канферэнцыі будзе выдадзены зборнік матэрыялаў “Віцебскі край”.
Матэрыял прадастаўлены Віцебскай абласной бібліятэкай імя У.І. Леніна і НІА бібліяграфіі Нацыянальнай бібліятэкі Беларусі.
