Прапануем вам разам з Нацыянальнай бібліятэкай Беларусі прайсці гэты 100-дзённы шлях – з 30 студзеня па 9 мая – і штодня знаёміцца з навінамі і падзеямі зімы – вясны 1945 г.
Усё далей ад нас тыя ваенныя 1418 дзён. Ужо многае забылася і шмат чаго стала вядомым. Але застаецца нязменным наша здзіўленне мужнасцю простых людзей, якія – хто з вінтоўкай, хто на прадпрыемствах у тыле – адстойвалі сваё права на жыццё. Пажоўклыя газетныя лісты – інфармацыйныя сведкі тых дзён. Выбіраючы тыя ці іншыя газетныя навіны, мы хацелі сцерці залаты пыл з тых падзей і ўбачыць жывых людзей з іх клопатамі, працай і марамі.
У гэты перыяд Чырвоная Армія ваявала ўжо далёка за межамі БССР і няўхільна рухалася да Берліна, да заканчэння цяжкай вайны. З аднаго боку, ваяваць было лягчэй: роднаму дому ўжо нічога не пагражае. Але з іншага – усё вакол было незнаёмым і чужым, небяспекай магло абпаліць з любога акна, павароту дарогі, ляснога гушчару, ці то ў Польшчы, Чэхаславакіі, Венгрыі ці Германіі, дзе ішлі баі ў гэты час. Нямецкая армія ўмела ваяваць, і, як смяротна паранены звер, агрызалася бязлітасна. Але не літасці чакала наша армія. Яна навучылася перамагаць. Хаця галоўная Перамога была яшчэ наперадзе.
Раман Матульскі пра праект да 75-годдзя Перамогі ў Вялікай Айчыннай вайне:
Тут жа, на тэрыторыі Беларусі, ужо некалькі месяцаў не былі чутны пранізлівыя гукі вайны. Поўным ходам ішло аднаўленне дзейнасці прадпрыемстваў і ўстаноў.
Публікуючы навіны з газет, што захоўваюцца ў фондзе Нацыянальнай бібліятэкі Беларусі, мы стараліся паказаць вялікія і малыя падзеі, якія адбываліся ў той час на фронце і ў тыле: баявыя дзеянні, аднаўленне прамысловасці, сельскай гаспадаркі, і, вядома, культурнага жыцця, у тым ліку працы ўсёй сеткі бібліятэк. Варты захаплення (без перабольшання) гераізм людзей таго часу, каму давялося ваяваць з вельмі моцным супернікам і перамагаць яго і каму давялося нанова (у прамым сэнсе) адбудоўваць даваеннае мірнае жыццё.
Чакаем вас на партале НББ і сайце “Беларусь у інфармацыйнай прасторы”!
Матэрыял прадастаўлены аддзелам карпаратыўнага ўзаемадзеяння.