9 снежня, у Міжнародны дзень памяці ахвяр злачынства генацыду, ушанавання іх годнасці і папярэджання гэтага злачынства, у Нацыянальнай бібліятэцы Беларусі адбылося фінальнае мерапрыемства ў рамках праекта “Успомніць усё. Памятаць кожнага”.
Мэта гэтага праекта – увекавечанне памяці ахвяр генацыду і распаўсюджванне дакладнай інфармацыі па пытаннях генацыду беларускага народа. На працягу года ў Беларусі прайшлі сустрэчы з працоўнымі і навучальнымі калектывамі, урокі Памяці, ва ўстановах адукацыі адкрыты экспазіцыі. Праведзены шэраг мемарыяльных мерапрыемстваў, у тым ліку рэспубліканскага ўзроўню, раённыя дыялогавыя пляцоўкі з моладдзю, конкурс відэаролікаў, распрацоўка і рэалізацыя экскурсійных маршрутаў.
У фінальным мерапрыемстве маштабную працу ў Год гістарычнай памяці падсумавалі выступленні начальніка галоўнага ўпраўлення ідэалагічнай работы і па справах моладзі Мінгарвыканкама Вольгі Чамаданавай, пракурора горада Мінска Алега Лаўрухіна, намесніка пракурора горада Мінска Сяргея Куракіна, доктара гістарычных навук, прафесара, члена-карэспандэнта Нацыянальнай акадэміі навук Беларусі, старшыні пастаяннай камісіі па адукацыі, культуры і навуцы Палаты прадстаўнікоў Нацыянальнага сходу Рэспублікі Беларусь Ігара Марзалюка, параалімпійскага чэмпіёна, грамадскага дзеяча Аляксея Талая, намесніка генеральнага дырэктара агенцтва “Минск-Новости”, галоўнага рэдактара газеты “Минский курьер” Кірыла Казакова. Спікеры падвялі вынікі адыходзячага года і падзяліліся вынікамі сумесных патрыятычна-выхаваўчых мерапрыемстваў.
Ва ўрачыстай абстаноўцы адбылося ўзнагароджанне пераможцаў конкурсу відэасюжэтаў, якія былі падрыхтаваны ў рамках рэалізацыі праекта “Успомніць усё. Памятаць кожнага”. Лепшыя, на думку кампетэнтнага журы, ролікі былі прадстаўлены грамадскасці.
Па выніках агляду экспазіцый, адкрытых на базе ўстаноў адукацыі і прысвечаных генацыду беларускага народа ў гады Вялікай Айчыннай вайны, прайшла цырымонія ўзнагароджання ўдзельнікаў конкурсу. Госці Нацыянальнай бібліятэкі маглі азнаёміцца з цікавымі экспанатамі і працамі пераможцаў на тэматычнай выставе, падрыхтаванай спецыяльна да фінальнага мерапрыемства ў рамках праекта “Успомніць усё. Памятаць кожнага”.
Матэрыял пададзены аддзелам сувязей з грамадскасцю.