22 кастрычніка ў Нацыянальнай бібліятэцы Беларусі адбылася фінальная частка Усебеларускай акцыі “Пытанне прэзідэнту”.
Мерапрыемства было арганізавана па ініцыятыве Беларускага рэспубліканскага саюза моладзі і Беларускай рэспубліканскай піянерскай арганізацыі ва ўсіх рэгіёнах краіны.
Беларускія школьнікі, навучэнцы і студэнты мелі магчымасць задаць свае пытанні прэзідэнту Рэспублікі Беларусь у перыяд з 14 красавіка па 25 мая.
У акцыі прынялі ўдзел больш за 3 000 маладых грамадзян Беларусі. Па выніках адборачнага галасавання толькі 60 з іх здолелі патрапіць на заключны этап акцыі, дзе кожны з запрошаных змог асабіста задаць сваё пытанне прэзідэнту.
Сустрэча доўжылася 2,5 гадзіны. Кіраўнік дзяржавы Аляксандр Лукашэнка адказаў на 20 пытанняў, у тым ліку і асабістага характару. Акрамя таго, прэзідэнт адзначыў неабходнасць у правядзенні падобных мерапрыемстваў і падкрэсліў важную ролю маладзёжных і дзіцячых аб'яднанняў у грамадскім жыцці краіны.
