14 сакавіка ў бібліятэцы адбылася ўрачыстая цырымонія ўручэння пашпартоў лепшым прадстаўнікам вучнёўскай моладзі Першамайскага раёна ў рамках Усебеларускай акцыі “Мы – грамадзяне Рэспублікі Беларусь”.
Цырымонія традыцыйна прымеркавана да Дня Канстытуцыі Рэспублікі Беларусь. Мэта акцыі – павышэнне значнасці паняцця “грамадзянін” у свядомасці маладых людзей, якія атрымліваюць пашпарт Рэспублікі Беларусь, прыцягненне ўвагі дзяржаўных органаў і грамадскіх арганізацый да пытанняў грамадзянска-патрыятычнага выхавання моладзі.
Ва ўступным слове юных грамадзян павіншавалі намеснік старшыні Мінскага гарвыканкама Жанна Бірыч і намеснік аддзела адміністрацыі Першамайскага раёна Мінска Аляксей Каштальян. Першы сакратар Першамайскага раённага камітэта ГА “БРСМ” Алена Лісай уручыла юнакам і дзяўчатам членскія білеты маладзёжнай арганізацыі.
Пасля ўрачыстага ўручэння пашпартоў і членскіх білетаў для маладых людзей была арганізавана азнаямленчая экскурсія па будынку Нацыянальнай бібліятэкі Беларусі.
Да Дня Канстытуцыі Рэспублікі Беларусь Нацыянальная бібліятэка падрыхтавала кніжную выстаўку ў кальцавым калідоры 2-га паверха. Выстаўка змяшчае каля 200 дакументаў, аднак галоўнае месца ў экспазіцыі займаюць стэрэатыпныя выданні Канстытуцыі Рэспублікі Беларусь 1994 г. са зменамі і дадаткамі, прынятымі на рэспубліканскіх рэферэндумах 24 лістапада 1996 г. і 17 кастрычніка 2004 г., а таксама кнігі, якія раскрываюць яе сутнасць і значнасць у сучасных умовах.