6 лютага падчас адкрыцця XXVI Мінскай міжнароднай кніжнай выстаўкі-кірмашу адбудзецца ўрачыстая перадача рэдкіх выданняў і рукапісаў з прыватнай калекцыі У.А. Ліхадзедава ў фонд Нацыянальнай бібліятэкі Беларусі.
У рамках дзяржаўна-прыватнага партнёрства рэалізуецца сумесны праект Нацыянальнай бібліятэкі Беларусі і лаўрэата прэміі Прэзідэнта Рэспублікі Беларусь “За духоўнае адраджэнне” Уладзіміра Аляксеевіча Ліхадзедава. Мэта праекта – пошук, вывучэнне, вяртанне ў дзяржаўныя зборы і папулярызацыя дакументальнай спадчыны Беларусі.
Сумесны праект прадугледжвае паступовую перадачу каля 100 тысяч дакументальных помнікаў з унікальнай прыватнай калекцыі У.А. Ліхадзедава у збор Нацыянальнай бібліятэкі Беларусі са стварэннем “Фонду Уладзіміра Ліхадзедава”. У гэтым фондзе будзе фарміравацца калекцыя рэдкіх выданняў XVI–XX ст. шляхам дарэння, часовага дэпазітарнага захавання, набыцця. Рарытэты з “Фонду Уладзіміра Ліхадзедава” будуць даступны для чытачоў бібліятэкі і паслужаць для арганізацыі выставак, ажыццяўлення навуковых, адукацыйных і выдавецкіх праектаў.
У рамках XXVI Мінскай міжнароднай кніжнай выстаўкі-кірмашу адбудзецца першы сімвалічны акт перадачы дакументальных помнікаў з калекцыі У.А. Ліхадзедава Нацыянальнай бібліятэцы Беларусі. Сярод іх кірылічныя і заходнееўрапейскія старадрукі беларускай тэматыкі, картаграфічныя матэрыялы, “спавядальныя ведамасці” і “шлюбныя вобшукі” праваслаўнай царквы (ХІХ ст.), дакументы аб шляхецкім паходжанні. Таксама будуць перададзены рукапіс беларускіх татар, арыгінальны прывілей Жыгімонта III Вазы (пачатак XVIІ ст.) на старабеларускай мове з калекцыі Тышкевіча, полацкі дакумент (XVI ст.), падшыўка Гродзенскіх губернскіх ведамасцей 1840-х гг. і інш.
Гэтыя кнігі, часопісы, архіўныя матэрыялы будуць дэманстравацца на працягу дзейнасці выстаўкі-кірмашу на стэндзе Міністэрства інфармацыі Рэспублікі Беларусь у экспазіцыі “У пошуках страчанага”.
Матэрыял прадастаўлены навукова-даследчым аддзелам кнігазнаўства.
